U niadzielu viečaram ź viciebskaha izalatara časovaha ŭtrymańnia byŭ vyzvaleny Pavał Krasoŭski. 23-hadovy aktyvist z Žodzina ad 4 kastryčnika znachodziŭsia za kratami pavodle niejmaviernych padozrańniaŭ: u arhanizacyi letašnich viciebskich vybuchaŭ i dvuch zabojstvaŭ niepaŭnaletnich dziaŭčynak u 1999 hodzie, kali Paŭłu było tolki 16 hadoŭ. Niahledziačy na stomlenaść, u paniadziełak zranicy Krasoŭski adkazaŭ na pytańni karespandenta «NN».
«Naša Niva»: Pavał, čym pravaachoŭniki patłumačyli Vaša vyzvaleńnie paśla takich strašnych abvinavačvańniaŭ u złačynstvach, u jakich Vas padazravali?
Pavał Krasoŭski: Dla mianie heta zastajecca taksama zahadkaj. Skončylisia dziesiać dzion, jakija jany mahli mianie ŭtrymlivać za kratami biez pradjaŭleńnia abvinavačvańnia, dalej utrymlivać mianie nie mahli. Vidavočna, što jany pabajalisia pačynać suprać mianie praces. Ź mianie nie źniali kančatkova padozrańnie, ja mušu źjaŭlacca dopyty i ź mianie była ŭziataja padpiska ab niavyjeździe. Usich padrabiaznaściaŭ svajoj spravy ja pakul sam nia maju, bo jašče nie sustrakaŭsia z advakatam Paŭłam Sapiełkam.
«NN»: Ci było pradčuvańnie, što Vas musiać vyzvalić?
PK: Nie, nie było. Pra vyzvaleńnie z turmy ja daviedaŭsia litaralna za niekalki chvilinaŭ da taho, jak ja vyjšaŭ z bramaŭ izalatara.
«NN»: Na čym, na jakich dakumentach hruntavałasia abvinavačvańnie suprać Vas?
PK: Nie było absalutna nijakich dokazaŭ majoj viny. Isnavała tolki adna papiera, jakaja śćviardžała, što ciaham aperatyŭna-śledčaj dziejnaści było vyśvietlena, što Krasoŭski Pavał maje dačynieńnie da letašnich vybuchaŭ u Viciebsku. Byccam u mianie ŭ Viciebsku jość niejkija suviazi, niechta tam mianie bačyŭ. Heta była adzinaja papiera, na padstavie jakoj vialisia dopyty. Bolej u śledčych ničoha nie było.
«NN»: Što adbyvałasia na dopytach?
PK: Raniej pra takoje ja čytaŭ tolki ŭ knižkach, ciapier pieražyŭ heta svajoj skury. Adbyvaŭsia žachlivy psychalahičny cisk. Mianie adkryta prymušali pryznacca ŭ hetych złačynstvach. Try pytańni jany zadavali ciaham dźviuch hadzinaŭ. Cisk nie spyniaŭsia ni na chvilinu. Vytrymać usio heta było vielmi ciažka i niaprosta. Brali niejkija analizy kryvi.
«NN»: Pavał, jak reahavali Vy na takija, abvinavačvańni, jakija pravaabaroncy tut, na voli, adrazu stali nazyvać absurdnymi?
PK: Ad pačatku ja nia viedaju za što, ź jakoj pryčyny mianie zatrymali, što inkryminujuć, kali ž ja daviedaŭsia, što mianie abvinavačvajuć u vybuchach, što heta «rasstrelny» artykuł, hleba pacichu pačała vypłyvać u mianie z-pad noh. Ja byŭ u samym sapraŭdnym šoku. Usio isnavała dla mianie ŭ niejkaj prastracyi, u tumanie. Było vielmi ciažka, ale tre było trymacca, bo amal štodzień doŭžylisia dopyty. Na piatyja-šostyja sutki, kali mianie pačali padazravać jašče ŭ dvuch zabojstvach, ja trochi supakoiŭsia, bo zrazumieŭ, što nijakich dokazaŭ śledztva nia maje, a mianie prosta sprabujuć złamić.
«NN»: Jakimi byli ŭmovy ŭtrymańnia ŭ izalatary?
PK: Voś krychu prastudziŭsia. U kamery było chaładnavata. Pa padłozie biehali pacuki. Spali na draŭlanych narach. Kamera była raźličanaja na čatyry čałavieki, ale zvyčajna ŭ joj było mieniej ludziej. Karmili adzin raz na dzień a čaćviortaj viečara. Było vielmi ćmianaje aśviatleńnie, amal niemahčyma było čytać.
«NN»: Pavał, dopyty tyčylisia tolki tych spravaŭ, u jakich Vas padazravali, ci pytalisia i pra inšaje?
PK: Naŭprostavych pytańniaŭ pra «Małady front» nie było, ale možna było zdahadacca, što hetaja tema ich cikavić. Mianie nieadnarazova pytalisia, ci viedaju ja tych ci inšych ludziej.
«NN»: Za hety hod heta nia pieršaja sproba pryciahnuć Vas da kryminalnaj adkaznaści. Ci nie było paśla ŭsich hetych padziejaŭ dumki kinuć hramadzkuju dziejnaść?
PK: Pra heta rana havaryć, za apošnija dni zanadta šmat usiaho sabrałasia. Heta stanie viadoma paśla taho, jak ja kryšačku adydu ad źniavoleńnia.
«NN»: Ci jość upeŭnienaść, što paśla ŭčorašniaha vyzvaleńnia Vaš pakinuć u spakoi?
PK: Nia viedaju. Ja bačyŭ, jak jany pracujuć, jakija metady vykarystoŭvajuć, tamu być u niečym upeŭnienym nie vypadaje.
U noč na paniadziełak Pavał Krasoŭski pryjechaŭ dadomu ŭ Žodzina, dzie i znachodzicca ciapier.
