Englishman in Minsk +dadaŭsia biełaruski pierakład pieśni Shape Of My Heart 3

Repartaž ź minskaha kancerta Stynha.

Voś toj, kaho my bačyli tolki na karcinkach i čuli adno na aŭdyjo- i videanośbitach, aŭtar viečna maładoj Roxanne, čyrvovy valet brytanskaj muzyki, jaki ŭłasnaj piersonaj udzielničaŭ u šalonaj dzialbie kartaŭ, hrošaj i dźviuch rulaŭ. Adčuvańnie takoje, my, bolš za dziesiać tysiač biełarusaŭ, jaki dazvolili sabie pryjści na «Minsk-arenu» dy pasieli adpaviedna z zahadzia kuplenymi kvitkami, zasłužyli jaho. Hetaha strunkaha čałavieka, jaki ŭpeŭnienaj chadoju padyšoŭ da 60-hadovaj miažy. Trochi čužoha ŭ Ńju-Jorku, a ŭ Minsku pahatoŭ. Hetaj Desert Rose/Pustelnaj ružy, jakaja raśćviła spasiarod paŭnočnaj krainy ź pierachodnaj ekanomikaj.

U procivahu narodnym «Skorpijonz»,

Stynh nie machaŭ ściaham, nie praktykavaŭsia prynahodna ŭ biełaruskaj movie (skarystoŭvaŭ napracoŭki z maskoŭskaha i pieciarburhskaha kancertu). Vydavaŭ reśpiektabielnyja ramansy kštałtu Fragile (pamiatajecie «…on end on…»). Vykrasaŭ na hubnym harmoniku pra shape svajho heart.

Amatar pabadziacca la Jerusalima na adlehłaści kinutaha kamienia (pieśnia Mad About You/«Ty zvodziš mianie z rozumu»).

Hetym viečaram «Dyskač 90-ch» pieratvaryŭsia ŭ «Słuchač 80-ch», a «Minsk-Arena» — u Pałac Respubliki. Usadžanaja ad bieraha da bieraha kresłami chakiejnaja placoŭka i

samavitaja publika ŭ bliskučym čornym bolš pasavali dla kancerta fiłarmaničnaj muzyki. Takim kancertam vystup Stynha, u pryncypie, častkova i byŭ (usio ž prezientacyja alboma «Simfonisici» — dobra znajomyja chity pad arkiestravy akampaniemient). Na scenie taksama panavaŭ siadziačy ład žyćcia: 45 udzielnikaŭ Karaleŭskaha fiłarmaničnaha arkiestra +hurt, +Sam. Zvykły pa klipach hruvastki bas u jaho rukach byŭ zamienieny na maleńkuju, havajskapadobnuju hitarku.

Pamiž maładymi i starymi šlahierami solnaj i «palicejskaj» krajery śpievaka byŭ navat abvieščany 20-chvilinny antrakt. Usio jak u ludziej.

I ŭsio ž Stynh adnoj pieśniaj nahadaŭ Kłaŭsa Majne sa «Skorpijonz», jaki ŭ svoj čas tutsama, na «Minsk-Arenie» z nastalhičynkaj u hołasie anansavaŭ «Viecier pieramienaŭ». Peŭna, u ich u Jeŭropie heta byŭ ščaślivy pieryjad, kali trava była zialonaja, vorahi — čyrvonyja, a vajna — chałodnaja. Kali dastatkova było prapiajać, što «rasijcy taksama lubiać dzietak» -- i ciabie adrazu zaličvali ŭ zmahary. Tak, tak, heta my pra stynhaŭskuju Russians, što tyčyłasia ŭsich "savieckich ludziej". I hučała jak uviekaviečany ŭ kamiani zaklik paburyć bierlinski mur.

Kulminacyjaj zrabiłasia miełanchaličnaja Moon Over Bourbon Street/«Miesiac pa-nad vulicaj Burbon». Kali z ekrana pa-nad scenaj źviesiłasia amal naturalnaja poŭnia, a Stynh z svaimi čornymi apranachami i basovymi notami nahadaŭ hierojaŭ svajho ŭlubionaha «Intervju z vampiram» i Toma Uejtsa.

Karcinki dziacinstva, čarhovy sieans nastalhii… Kožny krok, jaki robić Stynh, kožny ŭzdych, jaki ŭdychaje Stynh… Zapoŭnienyja trybuny «Minsk-Areny» daviali, što ŭ Stynhu my lubim nie jaho, a siabie ź im na fonie.

* * *

Darečy, źjaviŭsia biełaruski pierakład pieśni Shape Of My Heart.

Rysy maich sercaŭ. Pierakłała Maryjka Martysievič

Jon razdaje karty, niby apłatki
Kranajecca ich, jak čaścinak dušy
Hulnia dla jaho – nie šlach da bahaćcia
Hulnia dla jaho – nie šyk

Jon stavić fiški, niby pytańni
Ci b jon spaścihnuć formułu ŭdačy moh
U čym tajemny zakon kanca Hulni – i maści
Tančać u rukoch

Ja viedaju, viny – štyki žaŭnieraŭ
Ja viedaju, kuli ich – žałudy
Ja viedaju, zvonki źviniać u słavu vajnie
Ale nie takija sercy ŭva mnie

Jon moža adkryć svoj hałoŭny kozyr
Jon moža damaju vinaŭ bić
Jon moža schavać tuza, a ŭ jakim rukavie
Nichto nie nazavie

I kali ja skazaŭ tabie, što budu kachać viečna
Heta zusim nie značyć, što ja padmanu
Ja nie taki, kab chavacca za roznyja maski
Ja našu adnu

A toj, chto šmat kaža, nia znaje ničoha
I płacić za słovy pa poŭnaj canie
Jak toj, chto ŭhołas klanie svaju ŭdaču
Budzie zaŭždy na dnie

Ja viedaju, viny — štyki žaŭnieraŭ
Ja viedaju, kuli ich — žałudy
Ja viedaju, zvonki źviniać u słavu vajnie
Ale nie takija sercy ŭva mnie
Nie, nie takija sercy ŭva mnie

Pierakład pavodle:users.livejournal.com/maryjka.

Liza Kavalčyk

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH