Aktyvistu kampanii "Havary praŭdu" Michasiu Bašuru vystavili abvinavačańnie ŭ padrobcy dakumientaŭ, za što jamu pahražaje da troch hadoŭ źniavoleńnia. Nie vyklučajecca, što zaŭtra zatrymanaha pieraviaduć ŭ Žodzinski izalatar.
Aktyvista abvinavacili pavodle 1 i 2-oj častak 380 artykułu Kryminalnaha kodeksu. Heta "Padrobka, vyrab, vykarystoŭvańnie albo zbyt padroblenych dakumientaŭ, štampaŭ, piačatak, błankaŭ". Maksimalnaje pakarańnie — da troch hadoŭ źniavoleńnia ci 5 hadoŭ abmiežavańnia voli, chacia sud moža abmiežavacca i hrašovym štrafam. U druhoj pałovie 16-ha žniŭnia śledčy Savieckaha RAUS Minska vystaviŭ Michasiu Bašuru hetaje abvinavačańnie i padpisaŭ pastanovu ab dalejšym ŭtrymańni jaho pad vartaj.
Pavodle advakata Tamary Sidarenki, Bašura nie pryznaje siabie vinavatym.
"My ličym, što heta vynik pamyłki, a nie niejkaha namieru. Sapraŭdy, źviestki akazalisia niedakładnymi, heta jon sam vioŭ padliki, ale pamyliŭsia. Heta tolki pamyłka. Takim čynam my vinu nie pryznajem."
Advakat Tamara Sidarenka ŭžo nakiravała skarhu ŭ prakuraturu na niezakonnaje, jak jana ličyć, utrymańnie Michasia Bašury pad vartaj. Pavodle advakata, z udziełam Michasia Bašury aktyŭna viaducca śledčyja dziejańni. Tamara Sidarenka nie vyklučaje, što śledstva pa spravie zavieršycca da kanca žniŭnia.
Dziejańni, jakija inkryminujuć Bašuru, adbyvalisia 2 hady tamu. Pavodle śledmtva, Michaś Bašura, kab atrymać kredyt, pradstaviŭ padroblenuju daviedku ab prybytkach.
Ź viečara 6-ha žniŭnia da hetaha času Michasia Bašuru ŭtrymlivajuć u minskim izalatary na vulicy Akreścina. Na ŭmovy ŭtrymańnia, pavodle svajakoŭ, jon nie skardzicca. Ź inšych krynic stała viadoma, što 18 žniŭnia aktyvista mohuć pieravieźci ŭ žodzinski śledčy izalatar, viadomy svaimi bolš žorstkimi ŭmovami ŭtrymańnia viaźniaŭ.
U kampanii "Havary praŭdu" kažuć pra palityčna matyvavany pieraśled aktyvista Michasia Bašury i nahadvajuć, što mienavita z arandavanaj im kvatery biasśledna źnikli dziesiatki tysiač podpisaŭ, sabranych aktyvistami kampanii za pierajmienavańnie adnoj z vulic Minsku ŭ vulicu Vasila Bykava.
