Sustaršyni BCHD Hieorhiju Dźmitruku padatkovaja inśpiekcyja vystaviła rachunak na vypłatu štrafu ŭ pamiery 18 miljonaŭ rubloŭ (6 tysiač dołaraŭ) za nibyta pieravyšeńnie raschodaŭ šmatdzietnaj siamji biźniesmiena nad jaho dachodami za apošnija dziesiać hadoŭ.
Taki padarunak na 600‑hodździe Hrundvaldskaj pieramohi Hieorhij Dźmitruk atrymaŭ pa vynikach čatyrochmiesianaj pracy kobrynskich padatkavikoŭ.
«Čatyry miesiacy ja chadziŭ u padatkovuju inśpiekcyju amal jak na pracu. Spačatku jany praviarali maje dachody za hod, potym za dva, try, čatyry…, narešcie za apošnija 10 hadoŭ, — raspaviadaje presavaj słužbie BCHD Hieorhij Dźmitruk. — Jany praviarali ŭsio, što tolki možna i ŭ vyniku, nie znajšoŭšy pretenzij da dachodaŭ, vyznačyli, što raschody akazvajecca ŭ majoj siamji zavialikija, i roźnicu ŭ pamiery 6 tysiač dołaraŭ pamiž imi i maimi dachodami ja pavinien spłacić. Ja liču heta nonsensam i čarhovaj prajavaj biezzakonnaha cisku na mianie, jak sustaršyni BCHD i ŭdzielnika miascovaj vybarčaj kampanii».
U spadara Dźmitruka piaciora dziaciej: 19‑ci, 18‑ci ,15‑ci ,13‑ci i šaści hadoŭ, usia siamja žyvie razam. U svaich raźlikach padatkaviki apieryravali dachodami vyklučna Hieorhija Dźmitruka, a raschodami — usich členaŭ siamji. Sustaršynia BCHD maje namier abskardzić niezakonny na jaho dumku štraf u sudovym paradku.
Siabry BCHD źviazvajuć cisk na Hieorhija Dźmitruka ź jahonaj aktyŭnaj palityčnaj dziejnaściu, u tym liku z prezidenckaj kampanijaj: Dźmitruk adzin z kiraŭnikoŭ štabu pretendenta ŭ prezidenty ad BCHD Vitala Rymašeŭskaha.
