Pra heta zajaviŭ staršynia praŭleńnia AAT «Hazprom» Alaksiej Miler na sustrečy z premjer‑ministram Rasii Uładzimiram Pucinym u Novakuźniecku 24 červienia.
«Pytańnie poŭnaściu nie ŭrehulavana, my atrymali list ad pieršaha vice‑premjera Biełarusi, u jakim utrymlivajecca patrabavańnie pa apłacie za tranzit rasijskaha hazu pa ŭmovach, što nie adpaviadajuć kantraktu», — cytuje Milera RIA Novosti.
Kiraŭnik «Hazproma» taksama zaznačyŭ, što skaračeńnie abjomaŭ pastavak hazu ŭ Jeŭropu praź Biełaruś dasiahnuła 20% z‑za niesankcyjanavanaha adboru biełaruskim bokam.
Viečaram 23 červienia pieršy vice‑premjer Biełarusi Uładzimir Siamaška paviedamiŭ, što biełaruski bok zapatrabavaŭ ad «Hazproma»
pahasić zapazyčanaść za tranzit hazu ŭ pamiery 260 młn. dalaraŭ da 10.00 24 červienia.
«Kali heta nie budzie zroblena, Biełaruś maje namier spynić tranzit vuhlevadarodnaj syraviny», — zajaviŭ pieršy vice‑premjer.
Siamaška padkreśliŭ, što taryf na prapampoŭvańnie 1 tys. kub. m hazu na 100 km składaje 1,74 dalara. Adnak «Hazprom» ažyćciaŭlaŭ apłatu za tranzit pa taryfie 1,45 dalara. U vyniku za listapad—śniežań 2009 hoda ŭtvaryłasia zapazyčanaść.
Aprača taho, pavodle słoŭ Siamaški, za piać miesiacaŭ 2010 hoda «Hazprom» «nie zapłaciŭ nivodnaha centa za tranzit hazu». Takim čynam, utvaryłasia zapazyčanaść u pamiery 260 młn. dalaraŭ.
