Pieršy namieśnik ministra enerhietyki Biełarusi Eduard Taŭpianiec zajaŭlaje, što biełaruski bok pahasić hazavy doŭh da 5 lipienia, ale pieramovy buduć praciahvacca.
Spadar Taŭpianiec paviedamiŭ, što siońnia za podpisam pieršaha namieśnika premjer-ministra Ŭładzimira Siamaški na adras kiraŭnika «Hazproma» Alaksieja Milera nakiravany list, u jakim «Hazpromu» prapanujecca pahasić svoj doŭh za tranzytnyja pasłuhi.
U svaju čarhu «Biełtranshaz» da 23 červienia ŭ poŭnym abjomie raźličycca z «Hazpromam» za haz , pastaŭleny ŭ traŭni. Astatni doŭh u sumie $187 miljonaŭ budzie pahašany da 5 lipienia.
Taŭpianiec zajaviŭ, što Miensk čakaje pieršačarhovaha pahašeńnia tranzytnaj zapazyčanaści z boku «Hazproma», — paviedamlaje Interfaks.
U toj ža čas pradstaŭnik Minenerha zajaviŭ pra niedakładnaść raspaŭsiudžanaj rasiejskimi ŚMI z słoŭ pres-sakratara «Hazproma» Siarhieja Kupryjanava infarmacyi pra nibyta adsutnyja akty pryjomki tranzytnaha hazu.
Taŭpianiec: «Jak možna kazać pra heta, uvodzić u zman kirujučych rabotnikaŭ Rasiejskaj Federacyi?».
Pry hetym jon prademanstravaŭ žurnalistam dakumenty pa kožnym miesiacy. Taŭpianiec adznačyŭ, što ź biełaruskaha boku hetyja akty byli padpisanyja namieśnikam hieneralnaha dyrektara «Biełtranshaza» Dźmitryjem Aniukom, pradstaŭnikom «Hazproma» ŭ Biełarusi, ale na ich adsutničaje treci nieabchodny podpis — podpis «Hazproma».
Taŭpianiec: «Akty nakiroŭvalisia na podpis «Hazpromu», ale «Hazprom» ni adzin akt nie padpisaŭ».
