 |
Sustaršynia Biełaruskaj chryścijanskaj demakratyi Vital Rymašeŭski ličyć, što na hety momant jon maje samyja vialikija šancy stać adzinym kandydatam ad Biełaruskaha niezaležnickaha błoka. «NN» praciahvaje analizavać słabyja i mocnyja baki imaviernych kandydataŭ u prezidenty.
1. Partyja
+ Za Vitalom Rymašeŭskim staić padtrymka najbolš aktyŭnaj na siońniašni dzień partyi — Biełaruskaj chryścijanskaj demakratyi. Taksama BCHD zmahła zaručycca padtrymkaj «Maładoha frontu», «Pravaha aljansu», ruchu «Razam». BCHD aktyŭničaje, partyja raspačynaje novyja kampanii (suprać ałkahalizmu, akultyzmu, abortaŭ, vymirańnia biełarusaŭ, za siamiejnyja kaštoŭnaści), pracuje ź ludźmi. Na miascovych vybarach kandydaty ad «chadekaŭ» zmahli naźbirać kala 30 tysiač podpisaŭ. Na prezidenckich ža, kali pastaracca, to možna pieraadoleć barjer u 100 tysiač.
— Tym nie mienš, chryścijanskija demakraty adpužvajuć častku vybarcaŭ svaim praźmiernym relihijnym radykalizmam. U śvieckaj Biełarusi, jakaja ŭvachodzić u dziasiatku samym nierelihijnych krain śvietu, takija idei nie mohuć zaj¬mieć šyrokaj padtrymki. Sam Rymašeŭski — pravasłaŭny viernik. U svaim bractvie jon maje dosyć vialiki aŭtarytet.
2. Novy čałaviek
+ Rejtynh Milinkieviča bolšy za rejtynh Rymašeŭskaha. Ale i admoŭny rejtynh u lidera Ruchu «Za Svabodu» taksama bolšy. Rymašeŭski ŭ vialikaj palitycy čałaviek novy. Jon niby čysty arkuš, na jakim jašče tolki treba budzie zrabić zapisy. «Rymašeŭski hłabalna myślić, a dziejničaje łakalna», — kaža pra jaho paplečnik Pavieł Sieviaryniec.
— Z 1996 hoda, kali Rymašeŭski pryjšoŭ u nacyjanalny ruch, jon źmianiŭ niamała arhanizacyj. Spačatku byŭ u «Maładym froncie», potym u AHP, byŭ zasnavalnikam Ruchu «Za Svabodu», a ciapier voś pryjšoŭ u Biełaruskuju chryścijanskuju demakratyju. Takaja niestabilnaść moža być skarystanaja suprać Vitala. Praciŭniki buduć havaryć, što hety kandydat biehaje ad adnoj arhanizacyi da inšaj, dzie žyviecca bolš ciopła i sytna.
3. Ahresiŭnaść
+ Rymašeŭski vostry na jazyk. Jon nie chavaje svaich emocyj, kaža ŭsio naŭprost. Na lubych pieramovach sustaršynia BCHD pavodzić siabie davoli ahresiŭna. Kali jon nie zhadžajecca z surazmoŭcam, dyk abajazkova vykaža heta ŭsłych, trymać fihu ŭ kišeni nie budzie. Takija pavodziny časta dazvalajuć palityku dasiahać pastaŭlenych pierad saboj metaŭ.
— Praz svaju rezkaść Rymašeŭski pierasvarany sa značnaj častkaj apazicyjnych lideraŭ. Jany adhukajucca pra Rymašeŭskaha dosyć skieptyčna. Možna časta pačuć, što Vital prosta «kałocić panty», choć za im ničoha i niama. Apanienty taksama zakidajuć lideru «chadekaŭ» praźmiernuju hanarystaść.
4. Mator
+ Vital Rymašeŭski ŭvieś čas u ruchu, jon vielmi aktyŭny, nie moža znachodzicca bieź dziejańnia. Jon — mator mnohich kampanij i akcyj. Kalinoŭskaja rada «Maładoha frontu» za čas kiraŭnictva Rymašeŭskaha była samaj šmatlikaj i aktyŭnaj, jana naličvała bolš za 150 čałaviek, vydavała svaju hazietu, pravodziła papularnyja dyskateki. Nie źmianiŭsia ŭ hetym płanie Vital i ŭ BCHD. Jon umieje nastrojvać ludziej na pracu, davać im patrebny impuls.
— Praz takuju voś aktyŭnaść niaredka zdarajecca, što Rymašeŭski traplaje nie ŭ samyja pryhožyja historyi. Čaho tolki varty vypadak na Antykamunistyčnym forumie, kali Rymašeŭski zrabiŭ na padłozie chodniki sa śviežych numaroŭ niedziaržaŭnaj haziety «Tovariŝ». Biełaruskaja asacyjacyja žurnalistaŭ tady asudziła ŭčynak Rymašeŭskaha.
5. Siemjanin
+ U Rymašeŭskaha pryhožaja i mocnaja siamja. Na pieradvybarčych płakatach razam z žonkaj i dačkoj jon hladzieŭsia b vielmi dobra. Maładość i azart — heta plusy Rymašeŭskaha.
— Majučy ŭžo 35 hadoŭ, Rymašeŭski jašče nidzie tołkam nie pracavaŭ. «Viedajecie, kali čałaviek u svaim žyćci nie pracavaŭ, nie zarablaŭ hrošy narmalnaj pracaj, nie kiravaŭ chacia b dziasiatkam ci paŭsotniaj ludziej, dyk iści kiravać krainaj — heta śmiech i błazienstva», — vykazaŭsia pra Rymašeŭskaha pieršy kiraŭnik niezaležnaj Biełarusi Stanisłaŭ Šuškievič.
***
Vital Rymašeŭski naradziŭsia ŭ 1975 u Babrujsku. Skončyŭ BNTU pa śpiecyjalnaści «inžynier‑budaŭnik». Prafiesijna zajmajecca palitykaj z 1996 — tady jon staŭ členam kaardynacyjnaha savieta arhanizacyi «Biełaruskaje ab`iadnańnie maładych palitykaŭ». U 2005—2006 — kaardynatar pieradvybarnaj kampanii Alaksandra Milinkieviča pa Frunzienskim rajonie Minska. U 2006 staŭ zasnavalnikam BCHD. Žanaty, maje dačku.
