Alaksandr Łukašenka 5 maja padpisaŭ ukaz № 236 «Ab stvareńni departamienta «Biełsielhasnahlad» i ŭniasieńni dapaŭnieńnia i źmianieńniaŭ u niekatoryja ŭkazy prezidenta Respubliki Biełaruś».
Jak paviedamiła pres‑słužba prezidenta, zhodna z dakumientam, u Minsielhascharčy budzie stvorany departamient «Biełsielhasnahlad» z pravami jurydyčnaj asoby i ŭ miežach isnujučaj kolkaści i srodkaŭ, praduhledžanych u respublikanskim biudžecie na ŭtrymańnie terytaryjalnych orhanaŭ hetaha ministerstva.
U padnačaleńnie departamientu pieradajucca padviedamasnyja Minsielhascharču arhanizacyi, jakija ažyćciaŭlajuć kantralujučyja funkcyi: HU «Biełaruskaje ŭpraŭleńnie dziaržaŭnaha vieterynarnaha nahladu na dziaržaŭnaj miažy i transparcie», HU «Hałoŭnaja dziaržaŭnaja inśpiekcyja pa nasieńniavodstvie, karancinie i achovie raślin» z terytaryjalnymi padraździaleńniami, a taksama RU «Dziaržaŭnaja chlebnaja inśpiekcyja». Departamientu taksama budzie padnačalena stvaranaje Minsielhascharčam HU «Hałoŭnaja dziaržaŭnaja inśpiekcyja pa vieterynarnym nahladzie» ź jaho terytaryjalnymi padraździaleńniami ŭ abłaściach.
Jak prakamientavała pres‑słužba, analiz dziejučaj u krainie sistemy kantrolu za vykanańniem zakanadaŭstva ŭ śfiery vieterynaryi, nasieńniavodstva, karancinu i achovy raślin, jakaściu charčovaj syraviny i charčovych praduktaŭ pakazvaje, što «ŭ śfiery sielhasvytvorčaści asobnyja funkcyi dziaržaŭnaha kantrolu i nahladu na ŭsich uzroŭniach kiravańnia sumieščanyja z vykanaŭčymi abo rehulujučymi funkcyjami». «Taki kantrol źjaŭlajecca nieefiektyŭnym i nie ŭ poŭnaj miery sadziejničaje stvareńniu ŭmoŭ dla vytvorčaści biaśpiečnych dla zdaroŭja čałavieka charčovaj syraviny i charčovych praduktaŭ, pryviadzieńniu pakazčykaŭ ich jakaści i biaśpieki ŭ adpaviednaść z rekamiendacyjami mižnarodnych arhanizacyj i krain — handlovych partnioraŭ», — zaznačaje pres‑słužba.
Aprača taho, pavieličeńnie patoku tranzitu praz terytoryju Biełarusi charčavańnia, sielskahaspadarčaj syraviny, žyvioł i ptuški vymahaje stvareńnia nadziejnaj sučasnaj sistemy kantrolu, skiravanaj na praduchileńnie praniknieńnia na ŭnutrany rynak niajakasnaj i hienna‑madyfikavanaj pradukcyi, havorycca ŭ paviedamleńni.
Čakajecca, što realizacyja ŭkaza dazvolić stvaryć u krainie «cełasnuju sistemu dziaržaŭnaha kantrolu i nahladu ŭ śfiery sielskahaspadarčaj vytvorčaści».
