Supracoŭnik milicyi 1 Maja zastreliŭ zamiežnika, jaki sprabavaŭ abrabavać juvielirny mahazin "Załatoje Runo" ŭ horadzie Kryvy roh (Dnieprapiatroŭskaja vobłaść).
Pra heta paviedamlaje tut.by sa spasyłkaj na Podrobnosti.
U 9.40 u kramie spracavała "tryvožnaja knopka", narad milicyi prybyŭ na miesca i vyjaviŭ, što ŭ kramie raźbityja vitryny, a pradaviec źviazany skotčam.
U hety čas dvoje nieviadomych sprabavali vyjści z kramy, pry hetym adzin ź ich pasprabavaŭ vychapić tabielnuju zbroju ŭ supracoŭnika milicyi.
Paśla papiaredžvalnych strełaŭ milicyjant streliŭ napadniku ŭ hrudzi, a druhi rabaŭnik zdoleŭ uciačy.
Paranieny pamior praz paŭtary hadziny ŭ špitali, prymianieńnie zbroi milicyjantam pryznanaje apraŭdanym.
Vyśvietliłasia, što za 10 chvilin da spracoŭvańnia "tryvožnaj knopki" hetyja dvoje mužčyn zajšli ŭ kramu i, pahražajučy fizičnaj raspravaj, źviazali pradaŭščycu, jakaja paśpieła nacisnuć knopku sihnalizacyi, skotčam, raźbili stełažy i sabrali juvielirnyja vyraby, choć vynieści ich im usio-taki nie ŭdałosia.
U kišeni paranienaha milicyjanty znajšli klučy ad mikraaŭtobusa Mercedes-Benz Sprinter, jaki znachodziŭsia niepadalok, ź biełaruskimi numarami.
U im byli znojdzienyja dva mabilnyja telefony, pašpart zahinuŭšaha -- hramadzianina Biełarusi 1961 hoda naradžeńnia, i techpašpart, vypisany, jak miarkujecca, na druhoha napadnika, jaki źjaŭlajecca abo adnafamilcam, abo svajakom zahinuŭšaha.
Ciapier taho druhoha šukajuć. Taksama milicyja praviaraje, jak mikraaŭtobus i dvoje rabaŭnikoŭ ź Biełarusi trapili va Ukrainu, i ci na zakonnych padstavach tam znachodzilisia.
