 |
Kolki staronak mastackaha tekstu, 53 čorna-biełyja fatazdymki hornych krajavidaŭ i kałarytnych tubylcaŭ, dva listy faniery ŭ jakaści vokładki, humovyja paski, što pieraciahvajuć vokładki — usio heta fotaalbom «Bližie tolko niebo», pryśviečany dalokamu Tybietu.
Čamu nie zrabić zvyčajnaje, zmacavanaje klejem dy azdoblennaje papiarovaj vokładkaj, vydańnie? Aŭtar knihi, fotamastak i žurnalist, minčuk Alaksiej Andrejeŭ adkazvaje, što mienavita hetak vyštukoŭvajucca tybieckija knihi. Akramia taho, kali kniha rassyplecca, dyk ničoha strašnaha — kožnaja dumka pačynajecca i zakančvajecca na adnoj staroncy, a dla zaprašeńnia da razvahaŭ i kulturnych miedytacyjaŭ asobna ŭziataha zdymka — dastatkova.
 |
«Staraja fartecyja na vysokaj hary. Ściorty kamień vuzkich vułak. Vyšej i vyšej. Sutońnie dvaroŭ-kałodziežaŭ. Napaŭściortyja freski rośpisaŭ u malitoŭnych załach. (…). Manastyr u horach. Nizkaje sonca. Pach pałynu. Ciša».
Praz palityčny kanflikt pamiž Kitajem i Tybietam dy banalnuju dalokaść hetaha kraju, siudy redka traplajuć turysty, biełaruskija — pahatoŭ. Hetyja fotazdymki — vynik 12-dzionnaha padarožža, jakoje ździejśniŭ aŭtar u 2008 hodzie.
Tolki daroha tudy doŭžycca 4 dni. Minsk—Ašhabad—Piekin—Čyndu (stalica sumiežnaj z Tybietam pravincyi Syčuań) i 2 dni ciahnikom pad stromuju horu — ažno da tybieckaha Łchasa. Sami nazvy — danosić vodhulle taho tajamničaha kraju: Łchasy, Hjandze, Šyhadze, manastyry Tašypchunpo, Drak Jerpa i Ccha Hun, Danh Kchonh, voziera Jamdrok Tccho, adnym słovam dach śvietu…
Dla aŭtara, prasiaknutaha ŭschodniaj fiłasofijaj i litaraturaj, jaki za savieckim časam adno maryŭ pra vandroŭki na daloki, vielmi daloki Ŭschod — heta sapraŭdny ryvok: i ŭ prastory i ŭ duchoŭnym vymiareńni.
«Viadoma, tolki pierasiakaješ miažu, niavažna na jakoj movie ty razmaŭlaješ, adčuvaješ, što ty biełarus, bo krajavidy całkam niepadobnyja: kamień i śpičaki, — kaža Alaksiej Andrejeŭ. — Ź inšaha boku tut usio, što łučyć z astatnim čałaviectvam — asabliva nieba, niavažna, siniaje ŭ Tybiecie i šeraje ŭ Minsku, jano ŭ nas adno».
Vydańnie «Bližej tolki nieba» — rarytetnaje: vydadziena ŭsiaho-tolki 150 asobnikaŭ i nabyć jaje možna ŭ halerei «Ŭ».
 |
Pahladzieć fotazdymki Alaksieja Andrejeva z Tybietu možna tut.
