U orhanach pahraničnaj słužby Biełarusi vyviedziena novaja parodnaja linija słužbovych sabak z palepšanymi rabočymi jakaściami. Nazyvać jaje novaj parodaj pamiežniki pakul nie advažvajucca. Rabočaja nazva sabak «miks».
Jak paviedamiŭ 22 studzienia ŭ Smarhoni (žurnalistam načalnik kinałahičnaha centra orhanaŭ pahransłužby Hienadź Hucu, parodnaja linija atrymana šlacham skryžoŭvańnia bielhijskaj i niamieckaj aŭčarki. U pieršym pakaleńni było vyviedziena kala 30 ščaniat.
Ciapier maksimalny ŭzrost hetych sabak kala troch hadoŭ. Prykładna 70% ź ich było nakiravana na miažu dla vyvučeńnia ich rabočych charaktarystyk. Astatnija byli pakinuty ŭ centry dla vyvučeńnia ich pavodzinaŭ u hrupie.
U druhim pakaleńni było atrymana kala 20 ščaniat, maksimalny ŭzrost sabak ciapier składaje paŭtara hoda. Pavodle słoŭ Hucu, u zaležnaści ad taho, jak pakažuć siabie sabaki, budzie pryniata rašeńnie ab dalejšym kirunku palapšeńnia parodnaj linii — bielhijskaj abo niamieckaj aŭčarki.
Śpiecyjalisty ŭžo ciapier kanstatujuć, što «miks» lepš paddajecca dresiroŭcy, čym niamieckaja aŭčarka.
Tak, kali dla niamieckaj aŭčarki patrabujecca šeść miesiacaŭ dresiroŭki, to dla «miksa» — čatyry. Načalnik kinałahičnaha centra orhanaŭ pahransłužby taksama adznačyŭ, što mietysy — «śmiełyja i rašučyja sabaki, pa typu niervovaj sistemy — sanhviniki». U ich dobry fizičny stan, mocny imunitet, jany mienš schilnyja da zachvorvańniaŭ, čym bielhijskija i niamieckija aŭčarki.