U žniŭni 2023 hoda dźvie siastry, hramadzianki Ukrainy, pajechali ŭ Biełaruś u siamiejnych spravach. Adna ź ich adsiedzieła ŭ śledčym izalatary 5 miesiacaŭ i zmahła viarnucca va Ukrainu, a druhuju asudzili na 3 hady źniavoleńnia za nibyta raźviednuju dziejnaść na karyść Ukrainy. Radyjo Svaboda maje ich realnyja imiony, ale ŭ publikacyi ich źmianili ŭ metach ichnaj biaśpieki.
Abiedźvie ŭkrainki — žycharki Čarnihava. Uletku 2023 hoda jany pajechali ŭ Biełaruś razam sa svaimi dziećmi. U adnoj ź ich kolišni muž — biełarus, i jana chacieła zabrać u jaho alimienty na čatyrnaccacihadovaha syna.
Ich abiedźviuch zatrymali z-za padazreńnia ŭ raźviednaj dziejnaści na karyść Ukrainy. U telefonie znajšli zdymak vajskovaj techniki, jaki zrabiŭ jaje syn.
U KDB Biełarusi źviarnuŭsia Mikoła P., kab vyśvietlić padstavy zatrymańnia svajoj žonki Kaciaryny P., jakaja supravadžała svaju siastru ŭ pajezdcy.
«Tak, ja źviartaŭsia. Maja žonka ŭžo doma, ale jaje sapraŭdy zatrymlivali. Joj inkryminavali raźviednuju dziejnaść, špijanaž. Jana piać miesiacaŭ siadzieła ŭ izalatary, ale potym jaje vyzvalili, navat nie viedaju, jak heta adbyłosia. Bo ja ž tudy nie moh pajechać — žoncy kazali, što kali pryjedzie muž, to jaho dakładna pasadzim», — skazaŭ Svabodzie Mikoła P.
A siastra Kaciaryny, dadaŭ Mikoła P., i ciapier siadzić. «Znajšli nibyta niejki zdymak u syna, jana z synam jechała. U jaje kolišni muž — biełarus i nie vypłačvaŭ alimientaŭ, i jany pajechali raźbiracca, a ich tam zatrymali. A mały ŭziaŭ i sfotkaŭ niejkuju vajskovuju techniku, i za heta pasadzili maci. Dali joj try hady», — patłumačyŭ ukrainiec.
Pavodle jaho słoŭ, jany jechali ŭ Homiel, ale ich zatrymali nieŭzabavie paśla pierasiačeńnia miažy. «Siastra Kaciaryny siadzieła ŭ izalatary, a ciapier užo pieraviali na turmu. Z ulikam taho, što adsiedzieła ŭ izalatary, ličycca, što jana ŭžo adsiedzieła tam adzin hod», — paviedamiŭ Mikoła P.
«Dziaciej my zmahli viarnuć. Jaje synu ciapier 14 hadoŭ, a majmu 15, jany byli razam i zmahli vyjechać. Ich tam nie kantralavali, i my paprasili znajomych im dapamahčy viarnucca dadomu», — adznačyŭ ukrainiec.
Z pačatku rasijskaha vajennaha ŭvarvańnia, jakoje padtrymaŭ Alaksandr Łukašenka i vajskovaje kiraŭnictva Biełarusi, na biełaruskaj terytoryi pieryjadyčna zatrymlivali hramadzian Ukrainy i sudzili za špijanaž, ahienturnuju ci raźviednuju dziejnaść. Ahulnaja kolkaść asudžanych u Biełarusi hramadzian Ukrainy nieviadomaja.
Čytajcie taksama:
Mastaka Ivana Viarbickaha znoŭ buduć sudzić za «złosnaje niepadparadkavańnie administracyi kałonii»
Hłybockaha bodzibiłdara Šarabajku znoŭ buduć sudzić
Stała viadoma, z-za čyjho danosu apynułasia za kratami 75-hadovaja babrujčanka
