VUP
Admoŭny ŭkład siektara ŭ pryrost VUP za 2023 hod skłaŭ minus 0,9%. U hetym hodzie siektar «Infarmacyja i suviaź» praciahvaje strymlivać rost ekanomiki.
Ale jość i pazityŭnyja momanty. Pa-pieršaje, admoŭny ŭpłyŭ IKT na dynamiku VUP, kali supastaŭlać 2023 hod i pačatak 2024 hoda, užo mienšy, za studzień — minus 0,3%. Pa-druhoje, siektar «Infarmacyja i suviaź» užo nie adziny tormaz ekanomiki, a na paru z budaŭnictvam.
Adroźnivajecca situacyja ŭ Minsku, dzie zarehistravana bolšaść IT-kampanij. Tut «Infarmacyja i suviaź» — adziny siektar, jaki strymlivaje rost ekanomiki. Za studzień hetaha hoda admoŭny ŭkład IKT skłaŭ minus 0,8%. Dla paraŭnańnia, za ŭvieś 2023 hod minus byŭ značna vyšejšy — 2,7%.
Uvosień minułaha hoda namieśnik ministra ekanomiki Andrej Kartun kazaŭ pra adnaŭlenčy trend u IT. Ale ličby Biełstata pakul nie dapamahajuć acanić, nakolki palepšyłasia situacyja. Vysnovy možna budzie zrabić, vierahodna, pa vynikach pieršaha kvartała 2024.
Pry hetym dola siektara «Infarmacyja i suviaź» u VUP praciahvaje padać. U studzieni 2023 hoda dola składała 5,4%, za studzień — śniežań 2023 hoda — 4,5%, a pa vynikach studzienia 2024 hoda — užo 3,8%.
Darečy, analityki Jeŭrazijskaha banka raźvićcia prahnazujuć zapavoleńnie ekanamičnaha rostu ŭ Biełarusi ŭ 2024.
Pavodle ich acenak, VUP sioleta vyraście na 2% (pa vynikach 2023 vyras na 3,9%). Siarod faktaraŭ, jakija buduć strymlivać ekanomiku, analityki ŭskosna zhadali i technałahičny siektar. Zapavoleńnie rostu VUP čakajecca z-za «skaračeńnia zaniataści, uskładnieńnia łancužkoŭ pastavak i dostupu da technałohij».
Vyručka
Jak za 2023 hod źmianilisia asnoŭnyja finansavyja pakazčyki ŭ IT i suviazi?
Kampanii siektara «Infarmacyja i suviaź» atrymali bolš za 10 młrd rubloŭ vyručki. Ale ŭ paraŭnańni z 2022 hodam vyručka ŭpała na 3,4%.
Voś top-15 vidaŭ dziejnaści: vyručka za 2023 źniziłasia tolki ŭ «Infarmacyi i suviazi» i ŭ kampanij, jakija zajmajucca finansavaj i strachavoj dziejnaściu.
Prybytak i straty
Prybytku ŭ kampanij «Infarmacyi i suviazi» taksama stała krychu mienš. Za minuły hod jany atrymali bolš za 1,6 miljarda rubloŭ čystaha prybytku. Heta amal na 4% mienš, čym pa vynikach 2022 hoda.
Pravał zdaryŭsia ŭ čaćviortym kvartale. Bo i pa vynikach pieršaha paŭhodździa, i pa vynikach dzieviaci miesiacaŭ 2023 hoda kampanii «Infarmacyi i suviazi» pakazvali ahulny rost čystaha prybytku adnosna 2022 hoda.
Źviartaje na siabie ŭvahu i inšy fakt. Čysty prybytak u IT i suviazi stabilna padaje paśla 2020 hoda.
U siektary «Infarmacyja i suviaź» znajšlisia 24 stratnyja kampanii (na kaniec 2023 hoda). Ich ahulnaja strata pieravysiła 41 miljon rubloŭ — na 15% mienš, čym pa vynikach 2022 hoda.
Inviestycyja
Pa zamiežnych inviestycyjach niepasredna ŭ IT — poŭny pravał druhi hod zapar. U 2022 hodzie inviestycyi skaracilisia amal na 30%, za minuły hod — amal na 40%, abo na 160 miljonaŭ dalaraŭ.
Ahulny abjom zamiežnych inviestycyj u IT za minuły hod skłaŭ 233,6 miljona dalaraŭ. Inviestycyi ŭpali faktyčna da ŭzroŭniu 2018 hoda.
Čytajcie taksama:
Biełstat: VUP Biełarusi za dva miesiacy vyras na 4 pracenty
Biełaruś zabaraniła ŭvozić šerah tavaraŭ ź Litvy. Chto pacierpić ad hetaha bolš? Tłumačyć ekanamist
