U piatnicu ŭviečary YouTube-kanał Kanal Zero apublikavaŭ intervju Dudy. Jamu zadavali roznyja pytańni, a kali dajšło da Ukrainy, polski prezident skazaŭ, što Rasieja choča atrymać pieramohu va Ukrainie, i kali jana zachavaje sabie zachoplenyja ŭkrainskija terytoryi — imaviernaść novaha napadu vysokaja.
Pry hetym Duda dadaŭ, što vieryć, što Ukraina viernie Danieck i Łuhansk, ale nie viedaje, ci viernie jana Krym.
«Krym — heta asablivaje miesca, uklučajučy histaryčnyja pryčyny. Tamu što nasamreč, kali my pahladzim na historyju, to jon doŭhi čas byŭ pad kantrolem Rasiei», — skazaŭ Andžej Duda.
Polski prezident viadomy jak adzin z samych addanych prychilnikaŭ Ukrainy ŭ Jeŭropie. Za pieryjad poŭnamaštabnaha rasiejskaha ŭvarvańnia jon nie raz pryjazdžaŭ u Kijeŭ i vykazvaŭ padtrymku ŭkrainskim uładam.
Polšča zastajecca adnym z najbujniejšych vajskovych donaraŭ Ukrainy ŭ Jeŭropie, jana taksama pryniała miljony ŭkrainskich uciekačoŭ.
I choć ciapier Polšča nieachvotna padaŭžaje termin znachodžańnia ŭkrainskich uciekačoŭ u svajoj krainie, dy i ahułam u stasunkach pamiž dźviuma krainami praz praciahłyja pratesty polskich ahraryjaŭ i pieravozčykaŭ adčuvajecca peŭny choład, na ŭzroŭni rytoryki polskija palityki dahetul zaŭsiody padtrymlivali Ukrainu i nie stavili pad sumnieŭ jaje mety, u pryvatnaści viarnuć anieksavany Krym.
Zajavy Dudy ab Krymie raniej byli adnaznačnyja — jon zapeŭnivaŭ, što Ukraina pavinna vyzvalić anieksavany paŭvostraŭ. A ŭ žniŭni padčas vystupu na Krymskaj płatformie prezident Polščy dadaŭ, što ad taho, ci zmoža Ukraina «zamacavać» za saboj Krym, zaležyć zachavańnie ŭsiaho suśvietnaha paradku.
Apošniaja zajava Dudy, jaki zjaŭlajecca palityčnym sajuźnikam pravaj partyi «Prava i spraviadlivaść», jakaja niadaŭna pierajšła ŭ apazicyju, vyklikała rezkuju krytyku pradstaŭnikoŭ kiroŭnaj kaalicyi.
«Chacieŭ by nahadać spadaru Dudzie, što ŭ našaj krainie jość harady, jakija ŭ svajoj historyi naležali Polščy na praciahu mienšaha pieryjadu času, čym inšaj dziaržavie, — napisaŭ na płatformie Ch (były Twitter) Raman Hiertych, deputat Siejma ad «Hramadzianskaj płatformy». — Zusim durnaja zajava!»
«Haniebna. Siońnia Duda kaža, nieviadoma, što z Krymam, bo «bolšuju častku času jon byŭ u rukach Rasiei». U žniŭni 2022 hoda jon śćviardžaŭ, što Krym — heta Ukraina, «hetak ža, jak Hdańsk zjaŭlajecca častkaj Polščy», — adznačyŭ pradstaŭnik «Hramadzianskaj kaalicyi» Kšyštaf Brejza.
«Polšča pryznaje niezaležnaść Ukrainy ŭ miežach jaje mižnarodna pryznanych miežaŭ, jakija byli nieadnarazova paćvierdžanyja Rasiejskaj Fiederacyjaj: pačynajučy z damovy ad 19 listapada 1990 hoda, Budapiešckaha miemaranduma ad 5 śniežnia 1994 hoda i Damovy ab miažy ad 28 studzienia 2003 hoda», — napisaŭ paśla słoŭ prezidenta polski ministr zamiežnych spraŭ Radasłaŭ Sikorski.
Zatoje ŭ polskich sacsietkach možna znajści roznyja reakcyi — niekatoryja karystalniki słovy Dudy rezka asudžajuć, niekatoryja — uchvalajuć.
Na słovy Dudy taksama adreahavaŭ ambasadar Ukrainy ŭ Polščy Vasil Zvaryč.
«Krym — heta Ukraina, tak jość i tak budzie. Padstava dla hetaha — mižnarodnaje prava, — napisaŭ Zvaryč u Ch, — časovaja akupacyja Kryma Rasiejaj — heta vajennaje złačynstva, za jakoje jana budzie pakarana. Deakupacyja Kryma — heta naša sa svabodnym śvietam ahulnaja zadača i abaviazak».
«My heta zrobim biez sumnievu. My vierym i pracujem razam», — dadaŭ ukrainski ambasadar.
U subotu polski prezident adreahavaŭ na škvał krytyki i napisaŭ na płatformie Ch, što jahonyja «dziejańni i pazicyja adnosna žorstkaj ahresii Rasiei suprać Ukrainy byli i jość zrazumiełymi ź pieršaha dnia: Rasieja parušaje mižnarodnaje prava, zjaŭlajecca ahresaram i akupantam. Napad Rasiei na Ukrainu i akupacyja mižnarodna pryznanych terytoryj Ukrainy, uklučajučy Krym, zjaŭlajecca złačynstvam».
Čamu jaho papiaredniaja zajava ab Krymie była zusim inšaj — polski prezident nijak nie patłumačyŭ.
Čytajcie taksama:
Na pryjomie ŭ prezidenta Dudy sabraŭsia ŭvieś ćviet biełaruskaj apazicyi FOTA
Cichanoŭskaja ŭ Varšavie sustrełasia z prezidentam Polščy i kiraŭnictvam polskaha parłamienta
Radasłaŭ Sikorski padziakavaŭ Cichanoŭskaj za vinšavańnie i nazvaŭ jaje prezidentkaj
