UK Mod
Avijacyja i bajavyja karabli ZŠA i Vialikabrytanii ŭ noč na piatnicu nanieśli ŭdary pa vajennych abjektach hrupoŭki chusitaŭ u Jemienie, jakija pry padtrymcy Irana ŭ apošnija paŭtara miesiaca razharnuli palavańnie na handlovyja sudny ŭ Čyrvonym mory, piša Bi-bi-si.
Zhodna z zajavami jak samich chusitaŭ, tak i amierykanskich i brytanskich krynic, udary naniesienyja pierš za ŭsio pa aeradromach, adkul, jak miarkuje raźviedka sajuźnikaŭ, zapuskalisia rakiety i drony, a taksama pa składach zbroi i radarach.
Pavodle słoŭ surazmoŭcaŭ ahienctva Reuters u administracyi ZŠA, udary nanieśli samaloty, karabli i padvodnaja łodka. CNN paviedamiła sa spasyłkaj na ananimnaha pradstaŭnika ŭładaŭ ZŠA, što ŭžyvalisia ŭ tym liku i kryłatyja rakiety Tomahawk.
Pradstaŭniki jemienskich chusitaŭ nazvali niekalki abjektaŭ, pa jakich ZŠA i Brytanija nanieśli ŭdary. Telekampanija CNN źviała hetyja abjekty ŭ karotki śpis. U jaho ŭvajšli
- vajskovaja baza Kachłan u pravincyi Saada;
- avijabaza Al-Dajłami na poŭnač ad stalicy Jemiena Sany;
- rajon aeraporta horada Chudajda na Čyrvonym mory;
- aeraport horada Taiz i inšyja abjekty ŭ pravincyi Taiz u paŭdniova-zachodnim kucie Jemiena;
- aeradrom horada Abs.
Brytanskija karaleŭskija pavietranyja siły abviaścili, što ich samaloty nanieśli ŭdary pa dźviuch celach, i adnoj ź ich byŭ aeradrom kala Absa. Pavodle źviestak raźviedki, ź jaho chusity zapuskali kryłatyja rakiety i drony.
Druhoj cellu byŭ kompleks u Bani, ź jakoha, pavodle źviestak raźviedki, zapuskalisia vyviedvalnyja i ŭdarnyja drony.
U pres-relizie pavietranych sił Brytanii havorycca, što ŭ nalocie na Jemien udzielničali čatyry ich samaloty Typhoon, jakija dalacieli z bazy na Kipry z dazapraŭkaj u pavietry. Udary jany nanieśli bombami Paveway IV sa spadarožnikavym i łaziernym naviadzieńni.
Adrazu paśla ŭdaraŭ z zajavami vystupili adnačasova prezident ZŠA Džo Bajden i premjer-ministr Vialikabrytanii Ryšy Sunak.
Bajden skazaŭ, što heta byŭ adkaz na napady chusitaŭ na handlovyja sudny ŭ Čyrvonym mory i što ZŠA z sajuźnikami biez vahańniaŭ naniasuć novyja ŭdary, kali jany spatrebiacca.
Ryšy Sunak zajaviŭ, što z punkta hledžańnia Brytanii ŭdar pa chusitach byŭ samaabaronaj.
«U apošnija miesiacy chusickaje apałčeńnie praviało šerah niebiaśpiečnych napadaŭ na handlovaje sudnachodstva ŭ Čyrvonym mory, stvaryŭšy pahrozu dla brytanskich i inšych zamiežnych sudoŭ», — skazaŭ Sunak.
«Tamu my razam sa Złučanymi Štatami pry nievajennaj padtrymcy Niderłandaŭ, Kanady i Bachrejna raspačali abmiežavanyja, nieabchodnyja i suraźmiernyja dziejańni ŭ paradku samaabarony», — zajaviŭ brytanski premjer.
Sunak zapeŭniŭ, što brytanskija karabli praciahnuć patrulavać Čyrvonaje mora ŭ składzie misii Operation Prosperity Guardian, achoŭvajučy handlovyja sudny, i zaklikaŭ chusitaŭ spynić napady na ich.
Vajaŭničyja zajavy chusitaŭ
«Usie datyčnyja zapłaciać za heta. My nie spynim atak, pakul vy nie sydziecie z rehijona, i my nie spynimsia taptać vas, pakul nie ŭbačym vas prynižanymi. Jemien ciapier daść Brytanii i Amierycy ŭrok na mory», — napisaŭ u Ch siabar vajskovaha kiraŭnictva chusitaŭ hienierał-major Džachaf Abdułsałam.
Krychu paźniej Abdułsałam abviaściŭ, što chusity nanieśli ŭdary ŭ adkaz pa karablach ZŠA i Brytanii ŭ Čyrvonym mory. Paćvierdžańniaŭ abo abviaržeńniaŭ z boku sajuźnikaŭ na ranicu piatnicy jašče nie było.
«Usie pahrozy amierykancaŭ i brytancaŭ nas nie spałochali i nie spałochajuć, i nie prymusiać nas admovicca ad vykanańnia našaha abaviazku — padtrymki našych bratoŭ u Hazie, — napisaŭ u sacsietkach pierad udaram inšy siabar kiraŭnictva chusitaŭ Abdułkader al-Martada. — Jany, chutčej, umacujuć našu vieru i našu ŭpeŭnienaść u pravilnaści našaj pazicyi i pravacie našaj spravy».
Rasija paśla ŭdaraŭ pa chusitach padała zapyt ab terminovym pasiadžeńni Rady Biaśpieki AAN 12 studzienia.
