Palicejskija, što byli zadziejničanyja ŭ vyšukovaj apieracyi. Fota: Kaŭnaskaja palicyja
U aŭtorak pozna ŭviečary paśla intensiŭnych pošukaŭ była znojdziena źnikłaja ŭ Kaŭnasie ŭ niadzielu 9-hadovaja Ahota. Dziaŭčynka była vykradziena, a padazravanaha zatrymali, piša Delfi.lt.
Pavodle źviestak palicyi, padazravany dobra padrychtavaŭsia da vykradańnia, abstalavaŭ śpiecyjalny haraž, u im i znajšli dziaŭčynku.
«Chočam paradavacca, heta historyja pośpiechu. Dziaŭčynka ciapier znachodzicca ŭ Kaŭnaskaj klinicy, pad nahladam daktaroŭ. Padazravany zatrymany», — skazaŭ na pres-kanfierencyi ŭ sieradu ŭnačy kamisar Renatas Pažeła.
U zatrymańni padazravanaha ŭdzielničali i supracoŭniki antyterarystyčnaha atrada «Aras».
42-hadovy vykradalnik trymaŭ dziaŭčynku ŭ adnym z haražoŭ. Supracoŭniki «Arasa» ŭvarvalisia ŭ haraž i nadzieli na mužčynu kajdanki.
«Apieracyja była niaprostaj, u nas była infarmacyja, što mužčyna moža być uzbrojeny», — skazaŭ kamisar. «Aras» byŭ padrychtavany da ŭsiaho. U haražy byŭ zaŭvažany mužčyna ź dziaŭčynkaj. Byli dadzienyja adpaviednyja kamandy, na mužčynu nadzieli kajdanki, jon byŭ zatrymany», — skazaŭ Pažeła.
Skrynšot videa Delfi.lt
Na pytańnie, ci akazvaŭ mužčyna supraciŭ, jon adkazaŭ: «Mabyć, kali ŭbačyŭ supracoŭnikaŭ «Arasa» ŭsia śmiełaść prapała. Nie było sprobaŭ aktyŭna supraciŭlacca, biehčy, niešta rabić ź dziaŭčynkaj. Moža, spracavaŭ faktar niečakanaści. Jon padparadkavaŭsia patrabavańniam». Kamisar skazaŭ, što haraž padazravanaha byŭ nie zvyčajnym, a śpiecyjalna abstalavanym.
«Nam za karotki čas udałosia raskryć kvalifikavanaje złačynstva. U budučyni budziem niamała kazać pra jaho. Nas čakaje vialikaja praca. Treba vyśvietlić, ci adzinaje heta złačynstva, ździejśnienaje hetym čałaviekam. Zatrymańnie adbyvałasia ŭ haražnym masivie. Adnosna niedaloka ad miesca vykradańnia, 1,5 km, ale znajści hetaje miesca było niaprosta. Pośpiech abumoŭleny spałučeńniem techničnych srodkaŭ, niuchu i dośviedu palicejskich», — skazaŭ kamisar.
Matyvy padazravanaha pakul niajasnyja. Havorka idzie pra žychara Kaŭnasa, jaki raniej nie byŭ sudzimy, ale nieadnarazova byŭ pakarany ŭ administracyjnym paradku. Mužčyna ź dziaŭčynkaj nijak nie źviazany.
«Złačynstva było ździejśniena davoli kvalifikavana, mužčyna nie čakaŭ, što jaho znojduć. Niekatoryja momanty nas ździvili», — dadaŭ Pažała.
Za vykradańnie mužčynu pahražaje pazbaŭleńnie voli na termin da 8 hadoŭ. Kamisar jašče raz padziakavaŭ tysiačam ludziej, jakija ŭdzielničali ŭ pošukach dziaŭčynki.
«Heta viestka patencyjnym złačyncam — vami zojmiecca nie tolki palicyja», — skazaŭ kamisar.
Čytajcie taksama:
Prezident PSŽ chavaŭsia ŭ samalocie z-za abvinavačvańniaŭ u vykradańni čałavieka
U Litvie znajšli vykradzienych dva tydni tamu dziaciej. Ich chacieli vyvieźci ŭ Biełaruś