Kałaž «Našaj Nivy»
«Bajpoł» u svaim videa raskazaŭ pra kanały, jakija padahravali kanflikt, skarystaŭšysia ŭnutranymi prablemami ŭ arhanizacyi.
Adzin ź ich — «Abjadnany štab supracivu». 8 červienia, da taho jak raskoł staŭ publičnym (sam kanflikt u arhanizacyi adbyŭsia 7 červienia), kanał ukinuŭ, što Azaraŭ — «paćvierdžany ahient HRU», a «Bajpoł» «napičkany ahientami režymu Łukašenki». Napisali taksama, što Azarava i Łupanosava pasprabujuć prybrać z «Bajpoł», niby kab zachavać biaśpieku ŭdzielnikaŭ płana «Pieramoha», a farmalnaj pryčynaj budzie finansavaja niadobrasumlennaść. Łupanosaŭ adznačaje, što finansavyja pytańni sapraŭdy abmiarkoŭvalisia ŭ «Bajpole», ale tolki siarod udzielnikaŭ arhanizacyi, tamu niechta źliŭ infarmacyju AŠS.
Paviedamleńnie z kanała AŠS, apublikavanaje ŭ 13:00, jašče da apubličvańnia kanfliktu ŭ «Bajpole»
Pa mierkavańni «Bajpoła», za kanałam AŠS staić Andrej Abozaŭ, jaki ciapier žyvie ŭ Estonii. Raniej «Našaj Nivie» paviedamlała hetuju ž infarmacyju jašče adna krynica.
Andrej Abozaŭ niekali byŭ aktyvistam supolnaści biełarusaŭ «Treci šlach» i adnym sa stvaralnikaŭ «Multkłuba», hrupy, jakaja rabiła satyryčnyja multfilmy pra Łukašenku. U 2005-m na jaho zaviali kryminalnuju spravu za abrazu Łukašenku, ale Andrej zdoleŭ vyjechać ź Biełarusi ŭ Estoniju.
Andrej Abozaŭ. Skrynšot ź videa postimees.ee
U 2007-m jon jechaŭ na ciahniku z Ukrainy dadomu ŭ Estoniju praz Rasiju i byŭ zatrymany. Pry zastupnictvie svajho znajomaha, rasijskaha palitołaha Andreja Suzdalcava, vyjechaŭ u Estoniju. Z taho času žyvie tam. Siarod prajektaŭ, u jakich jon udzielničaŭ z 2020-ha — strymy Valeryja Capkały i Biełaruski narodny trybunał.
Andrej Suzdalcaŭ — rasijski palitołah, jaki doŭhi čas žyŭ u Biełarusi, pakul nie byŭ vysłany ŭ Rasiju ŭ 2006 hodzie.
«Sovietskaja Biełoruśsija» (ciapier «Biełaruś siehodnia») tady abvinavaciła Suzdalcava ŭ pracy na rasijskija śpiecsłužby, što i stała pryčynaj vysyłki. Adnoj z prykmiet suviazi sa śpiecsłužbami było nazvana lačeńnie palitołaha ŭ vajskovym špitali ŭ Maskvie. «Aficer śpiecsłužby, chutčej za ŭsio, HRU Hienštaba MA Rasii», — zrabiŭ vysnovu Jakubovič.
Andrej Suzdalcaŭ. Fota: jutub-kanał BYPOL
Paśla publikacyi AŠS jaje padchoplivaje 37-hadovy błohier Vital «Virus» Kandracienka, ź jakim, pa infarmacyi «Bajpoł», mieŭ kantakty Uładzimir Žyhar (były siłavik, jaki ciapier u «Biełpole»). «Virus» viadomy prajektam OSINT «Fieniks» i «Aściarožna, virus svabody». Raniej udzielničaŭ u prajekcie «Radyjo 97%», paśla vyjechaŭ va Ukrainu i ciapier žyvie tam.
Błohier «Virus». Fota ź jahonaha jutub-kanała
«Bajpoł» śćviardžaje, što «Virusu» źlivaje infarmacyju HUBAZiK.
Paśla zvarotu Azarava, dzie toj zajaviŭ, što sacsietki «Bajpoł» zachoplenyja, pačynajuć vychodzić dziasiatki pastoŭ u roznych kanałach, źviazanych miž saboj, pra toje, što Azaraŭ byccam padazrajecca ŭ finansavych złačynstvach i vyjechaŭ z Polščy ŭ Italiju. A taksama što płan «Pieramoha» stvorany supracoŭnikami HUBAZiK. U hety momant u ataku na Azarava ŭklučyŭsia jašče i palitołah Dźmitryj Bałkuniec, rasijski kanał BRIEF i kanał «Kiroŭcy 97%».
Skrynšot z kanału OSINT «Fieniks»
Paźniej naratyŭ pra finansavaje pytańnie padchoplivajuć hrupy «Virus», AŠS, Bałkuniec i Andrej Suzdalcaŭ. Paśla da ataki padklučajecca Valeryj Capkała.
Ukidy, nakiravanyja suprać Azarava dy Łupanosava, źjaŭlajucca na pieraličanych vyšej kanałach pa niekalki razoŭ na dzień. Rasijski kanał BRIEF uvohule abvinavaciŭ Azarava ŭ pasadcy samalota Ryanair z Ramanam Pratasievičam.
Paviedamleńnie z rasijskaha kanała BRIEF
Ataka była nakiravanaja nie tolki na «Bajpoł» i Alaksandra Azarava, ale i na Śviatłanu Cichanoŭskuju dy družalubnyja da jaje struktury. Maŭlaŭ, kali «ahient HRU» Azaraŭ kiravaŭ tam pytańniami zakonnaści dy biaśpieki, to i ŭsie arhanizacyi napoŭnienyja ahientami.
A 16 červienia padklučajecca kanał «Minskaja siamibajarščyna». U dopisie Azaravu zakidajecca ahienturnaja praca, a Śviatłanu Cichanoŭskuju paprakajuć u tym, što jana pakryvaje ahienturu Łukašenki.
Skrynšot ź videa «Bajpoł»
«Bajpoł» ličyć, što adnym z aŭtaraŭ kanała moža być 43-hadovy Anatol Kotaŭ.
Jon skončyŭ Maskoŭski dziaržaŭny instytut mižnarodnych adnosinaŭ. Paśla pracavaŭ dziaržsłužačym — u MZS, Administracyi Łukašenki, Kiraŭnictva spraŭ Łukašenki, NAK, byŭ namieśnikam dyrektara fondu «Dyrekcyja II Jeŭrapiejskich hulniaŭ» u 2019-m. Zvolniŭsia 18 žniŭnia 2020-ha praź niazhodu z palitykaj Łukašenki. Kotaŭ blizki da Capkały i Bałkunca, źjaŭlajecca adnym z zasnavalnikaŭ Forumu demakratyčnych siłaŭ, jaki pravodziŭ Capkała.
Anatol Kotaŭ padčas pracy ŭ «Dyrekcyi Jeŭrapiejskich hulniaŭ». Fota: BiełTA
Adznačym, što praŭładnyja miedyja nazyvali aŭtarami kanała Hienadzia i Illu Ščarbininych. Heta syn i baćka, jakich u Biełarusi vinavaciać u raskradańni majomaści, a mienavita — prysabiečvańni 207 tysiač jeŭra ŭ akcyjach «Naftana». Abodva atrymali prytułak va Ukrainie, ale publičnaj dziejnaści nie viaduć.
9 lipienia AŠS apublikavaŭ daviedku-abjektyŭku z asabistaj spravy Azarava, jakaja zachoŭvałasia ŭ MUS. «Bajpoł» ličyć, što AŠS atrymaŭ hetuju infarmacyju ad biełaruskich śpiecsłužbaŭ.
Skrynšot z kanała AŠS
Nahadajem, raniej AŠS zajaŭlaŭ, što ŭzłamaŭ siervier łukašenkaŭskaha miedcentra. «Naša Niva» zasumniavałasia ŭ hetym. Paśla hetaha na naš sajt pačałasia DDoS-ataka.
Praz paru dzion z nami źviazalisia kalehi z «Aljansa rasśledavalnikaŭ Biełarusi» (ARB), jakija raskazali pra toje, što AŠS pieradaŭ im bolšy archiŭ infarmacyi. Jany pakazali nam inšyja słužbovyja dakumienty — dakładnyja zapiski i miedycynskija dakumienty inšych asobaŭ.
Prykład dakumientu, jaki jość u rasparadžeńni «Aljansa rasśledvalnikaŭ Biełarusi»
Takim čynam, imavierna, AŠS sapraŭdy maje šmat dakumientaŭ, ale niama dokazaŭ, što heta vynik uzłomu, a nie hulnia biełaruskich ci rasijskich śpiecsłužbaŭ.
10 červienia AŠS abvieściŭ papiaredniuju ataku na «Biełsat» — nibyta za toje, što toj daje vykazvacca Azaravu. Da hetaha, 25 maja 2023-ha jany atakavali «Jeŭraradyjo» za niepachvalny vodhuk na ichniuju dziejnaść u efiry.
Skryn paviedamleńnia AŠS pra papiaredniuju ataku na «Biełsat»
U vyniku «Bajpoł» ličyć, što ataka na ich i Azarava była praviedzienaja sumiesna biełaruskimi i rasijskimi śpiecsłužbami.
Na dumku bajpołaŭcaŭ, jany skarystalisia ŭnutranymi prablemami ŭ arhanizacyi i pačali praz svaje krynicy i ryčahi razhojdvać situacyju, užyvajučy pryjomy prapahandy i ŭkidvajučy praz kanały łžyvyja źviestki pra čalcoŭ arhanizacyi.
Stanisłaŭ Łupanosaŭ u videa śćviardžaje, što hetuju zdahadku jak imaviernuju im paćvierdzili i ŭkrainskija śpiecsłužbisty.
«Naša Niva» paprasiła kamientar u supracoŭnikaŭ «Biełpoł» — što jany dumajuć pra rolu AŠS u padbuchtorvańni i pahłybleńni ŭnutranaha kanfliktu ŭ tahačasnym «Bajpole», jaki ŭ vyniku raskałoŭsia na «Biełpoł» i «Bajpoł».
«My nie majem ani žadańnia, ani mahčymaściej kamientavać tak zvany «kanflikt», jaki tak padabajecca žurnalistam. Kali łaska, bolš z takoj nahody nie turbujcie nas», — adkazali «Našaj Nivie» ŭ «Biełpole».
Usia hetaja situacyja pakazvaje, jak śpiecsłužby starajucca vykarystać lubyja ŭnutranyja prablemy ŭ apazicyi dla jaje asłableńnia i stvareńnia raskołaŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Chranałohija kanfliktu ŭ «Bajpole» — što za čym adbyłosia
Azaraŭ patłumačyŭ, što adbyvajecca sa źviestkami z płana «Pieramoha»
Durnota ci zdrada? Kamientar «Našaj Nivy» pra situacyju ŭ «Bajpole»
