Vadzim Ivanoŭ. Fota: www.sb.by
Spravu na kiraŭnika sielhaspradpryjemstva «Radamylski», raspačatuju pavodle č.2 art. 19.11 KaAP (raspaŭsiud infarmacyjnaj pradukcyi, uklučanaj u respublikanski śpis ekstremisckich materyjałaŭ) 24 kastryčnika razhladała sudździa Alesia Sajan, źviarnuŭ uvahu telehram-kanał «Viciebsk, ja hulaju».
Rašeńnie suda pakul nieviadomaje, ale na pracy adkazvajuć, što Vadzima Ivanova «niama». U sacyjalnych sietkach apošni raz jon byŭ 20 kastryčnika.
Najčaściej administracyjnyja spravy za «raspaŭsiud ekstremizmu» siłaviki raspačynajuć, znajšoŭšy ŭ sacyjalnych sietkach padpiski na internet-resursy, pryznanyja «ekstremisckimi», abo reposty z takich resursaŭ. Na staronkach Vadzima Ivanova sustrakajecca i adno, i druhoje. A pobač — reposty z praŭładnych ŚMI, a taksama «kłasy» na staronkach siabroŭ pad materyjałami pra vajnu va Ukrainie, dzie ŭchvalajecca palityka Pucina.
40-hadovy Vadzim Ivanoŭ i sam nie adnojčy byŭ hierojem publikacyj u dziaržaŭnych miedyjach. Tak, u 2019-m hazieta «Naša Tałačynščyna» pryśviaciła jamu artykuł, dzie padrabiazna raspaviała bijahrafiju dyrektara sielhaspradpryjemstva. Jon naradziŭsia ŭ Oršy, skončyŭ ahrarny kaledž u Smalanach i pryjšoŭ pracavać u saŭhas «Radamylski» na pasadu ahranoma. U hetaj haspadarcy jon adpracavaŭ 19 hadoŭ, ź ich čatyry — u jakaści kiraŭnika.
U 2021 hodzie, kali Ivanova abrali delehatam Usiebiełaruskaha narodnaha schodu, u intervju rajoncy jon kazaŭ, što vielmi pieražyvaje za raźvićcio sielskaj haspadarki i «choča mira i spakoju». Letaś abłasnaja hazieta «Vitiebskije viesti» pisała pra pośpiechi haspadarki «Radamylski», nazyvajučy jaje «adnym ź niešmatlikich sielhaspradpryjemstvaŭ Tałačynščyny, jakoje pracuje rentabielna i źjaŭlajecca lidaram pa asnoŭnych pakaźnikach ekanamičnaha raźvićcia».
