Vyjava: Google
Akramia admysłovaha pošuku na bazie ŠI, Google dadaje ŭ svoj prajekt Search Generative Experience (SGE) novyja kantekstnyja staronki, kab pralić śviatło na zhienieravanyja adkazy i asobnyja veb-spasyłki ŭnutry adkazaŭ.
Google adkryvaje svoj pošukavy ŠI-instrumient dla amierykanskich padletkaŭ va ŭzroście ad 13 da 17 hadoŭ, zajaŭlajučy, što kampanija atrymała «asabliva stanoŭčyja vodhuki» ad 18-24-hadovych ludziej, jakija testavali SGE (Search Generative Experience, abo SGE, što była pradstaŭlena raniej u hetym hodzie jak častka novaj ekśpierymientalnaj pošukavaj płatformy Search Labs). Mienavita dobryja vodhuki i paŭpłyvali na rašeńnie Google pašyryć testavańnie na maładziejšych padletkaŭ, pieradaje Gizmodo.
U Google zajaŭlajuć, što jany dadali miery abarony dla praduchileńnia niedapuščalnaha abo škodnaha źmieściva na padstavie daśledavańniaŭ, praviedzienych z ekśpiertami pa raźvićci padletkaŭ. Naprykład, siarod inšaha ŭ novym pošukavym instrumiencie, pa słovach kampanii, ustalavali «macniejšyja aharodžy dla vychadaŭ, źviazanych ź niezakonnymi rečyvami abo tavarami, što majuć uzrostavyja abmiežavańni». Testavańnie budzie praciahvacca, i kampanija praciahnie źbirać vodhuki i pracavać sa śpiecyjalistami, kab naładzić SGE dla padletkaŭ.
Pačynajučy ź siońniašniaha dnia, kampanija taksama dadaje instrumient «Pra hety vynik» (About this result) u adkazy SGE, dapamahajučy karystalnikam zrazumieć, jakim čynam ŠI spyniŭsia mienavita na takim adkazie.
Vyjava: Google
Kab dapamahčy pačatkoŭcam zrazumieć hienieratyŭny štučny intelekt, Google apublikavaŭ kiraŭnictva pa navučańni štučnamu intelektu, jakoje słužyć pryvitalnym dapamožnikam dla SGE i inšych ŠI-prajektaŭ kampanii, takich jak Bard. Jon uklučaje parady, časta zadavanyja pytańni i abmierkavańnie jaho mahčymaściaŭ i abmiežavańniaŭ.
Narešcie, Google zajaŭlaje, što ŭnosić «metanakiravanyja palapšeńni» ŭ pošukavyja vyniki, atrymanyja z dapamohaj ŠI, jakija źjaŭlajucca iłžyvymi abo abraźlivymi. Vypuskajecca abnaŭleńnie, kab navučyć madel lepš vyjaŭlać «halucynacyi» abo niedapuščalny kantent. Uličvajučy, što čat-boty, jakija raspaŭsiudžvajuć dezynfarmacyju, užo daŭno ŭjaŭlajuć prablemu, Google taksama pracuje nad zdolnaściu vialikich moŭnych madelaŭ «krytykavać» svaje pieršapačatkovyja čarnavyja adkazy i pierapisvać ich z ulikam jakaści i biaśpieki.
U kampanii kažuć, što hienieratyŭny štučny intelekt moža dapamahčy maładym ludziam zadavać pytańni, na jakija zvyčajna ciažka ci niemahčyma atrymać adkazy ŭ kłasičnaj pošukavaj sistemie, a taksama dapamahčy stavić dadatkovyja pytańni z metaj zahłybleńnia ŭ tuju ci inšuju temu. «Pradstaŭlajučy novy instrumient padletkam, my chočam znajści pravilny bałans u stvareńni dla ich mahčymaściaŭ atrymać vyhadu z usiaho, što jon moža prapanavać, u toj ža čas addajučy pieravahu biaśpiecy i zadavalnieńniu ich patrebaŭ u raźvićci», — kažuć u Google.
Čytajcie taksama:
Štučny intelekt pieramoh troch čempijonaŭ pa honkach na bieśpiłotnikach u ich ułasnaj hulni
