49-hadovy ministr infarmacyi Piarcoŭ: Nie viedaju, dzie Zacharanka i Krasoŭski, mianie ŭ toj čas nie było na śviecie 9

Padčas razmovy ź ministram infarmacyi Uładzimiram Piarcovym. Skryn videa «Šuchier-šou»

Razmovu Andreja Pavuka ź ministram pakazali ŭ «Šuchier-šou» na kanale «Biełsat».

Pra žurnalista Azaronka i STB 

U razmovie abmiarkoŭvali telebačańnie i rolu asobnych žurnalistaŭ. Na repliku Pavuka ab tym, što žurnalist Azaronak raspalvaje varožaść, ministr zaŭvažyŭ, što zaklučeńnie ab hetym mohuć davać tolki sud i inšyja kampietentnyja pravaachoŭnyja orhany.

— My nie lubim Azaronka i chočam, kab jaho prybrali, — kaža Pavuk.

— Heta vaša hramadzianskaje prava ŭ svabodnaj krainie lubić ci nie lubić, — adkazvaje Piarcoŭ.

— My ž vas finansujem.

— Vy nas nie finansujecie. ZAT «STB» — kamiercyjnaja arhanizacyja. Zakrytaje akcyjaniernaje tavarystva, jakoje žyvie za košt kamiercyjnych dachodaŭ. Ź biudžetu finansujecca tolki Nacyjanalnaja dziaržaŭnaja teleradyjokampanija.

— Dyk my nijak nie možam paŭpłyvać na infarmacyjny paradak dnia?

— A čamu vy pavinny ŭpłyvać na infarmacyjny paradak dnia?

— Tamu što Azaronak nam nie padabajecca. Jon raspalvaje varožaść. Tamu što heta fejki.

— Nie padabajecca, nie hladzicie. Heta vaša hramadzianskaje prava. Jakija fejki ŭ Azaronka?

Łukašenka i «Tesła» ad Maska

Pavuk nahadaŭ pra zajavu Łukašenki ab tym, što jamu sam Iłan Mask padaryŭ aŭtamabil «Tesła». Siužet z hetymi słovami byŭ pakazany na biełaruskim telebačańni. Takim čynam telebačańnie raspaŭsiudziła niepraŭdzivuju infarmacyju.

— A pry čym tut praŭdzivaja, niepraŭdzivaja infarmacyja, jakuju my niasiom? Ja vam havaryŭ, što Iłan Mask padaryŭ «Tesłu» Łukašenku? — apraŭdvaŭsia Piarcoŭ.

— Łukašenka zajaviŭ pra heta. Pa biełaruskim telebačańni pakazali.

— Pačakajcie, nam usim padaryŭ Iłan Mask «Tesłu». Jon stvaralnik «Tesły».

— Voś jak vy vykrucilisia! Nie, heta było skazana nie tak. Było skazana, što jon asabista padaryŭ.

— Nu, moža być, pamyliŭsia. I što?

— Dyk raskažycie pra heta. Što ŭ nas prezident niedaloki.

— Ja taksama pierabłytaŭ niadaŭna Słavakiju i Sierbiju. Nu, zdarajecca tak, jak vystupaješ. Ja nie mahu skazać, što jon niedaloki. Heta niapraŭda. Čałaviek ź dźviuma vyšejšymi adukacyjami i takim dośviedam kiraŭnictva. I ni adzin vaš haspadar, jaki finansuje «Biełsat», nie ličyć jaho niedalokim, a, naadvarot, vielmi razumnym i prasunutym palitykam. Ja čytaju ich dakumienty. Ja kožny dzień čytaju amierykanskija i jeŭrapiejskija ahlady.

«Ja viedaju sacyjałohiju. Heta niapraŭda»

Andrej Pavuk nahadaŭ ministru infarmacyi pra zajavu Łukašenki ŭ intervju žurnalistu Dźmitryju Hardonu ab tym, što z terytoryi Biełarusi nikoli nichto nie napadzie na Ukrainu.

Pa mierkavańni Piarcova, «siońnia i dastatkova daŭno Ukraina dla Biełarusi varožaja dziaržava. A kali takija zajavy rabilisia, niahledziačy ni na što, Ukraina była nam siabroŭskaj krainaj».

Na pohlad ministra, Ukraina pieršaj pačała suprać Biełarusi ekanamičnuju vajnu. A ŭ siońniašnich vajennych dziejańniach biełarusy nie ŭdzielničajuć.

— Čamu ž tady Łukašenka havoryć, što my ŭdzielničajem? — pierapytaŭ Pavuk.

— My ŭdzielničajem tolki ŭ navučańni Uzbrojenych sił Rasii, sajuznaj nam dziaržavy.

— Dyk heta ž sadziejničańnie ahresaru.

— Nie, pa suśvietnaj vajennaj kłasifikacyi heta nie zjaŭlajecca ŭdziełam va ŭzbrojenym kanflikcie. Vyvučajcie dakumienty. My dapamahajem. I Ukrainie dapamahajuć inšyja dziaržavy. Ale jany nie ŭdzielničajuć va ŭzbrojenym kanflikcie. 50 dziaržaŭ udzielničaje ŭ finansavańni dapamohi, uzbrajeńniaŭ, u lačeńni Ukrainy. A my — adzinaja kraina, što dapamahaje Rasii.

Na repliku Pavuka ab tym, što padtrymka, jakuju akazvaje Rasii Biełaruś u vajnie, idzie nasupierak žadańniu biełarusaŭ, bo, jak viadoma, u hramadstvie mocnyja antyvajennyja nastroi, ministr adkazaŭ:

— Z čaho vy ŭziali, što vy nie chočacie dapamahać Rasii?

— U nas ža mocnyja antyvajennyja nastroi.

— Heta ŭ kaho? Mahčyma, u vas asabista. U inšych nie.

— Biełarusy suprać vajny.

— Nie. Heta niapraŭda. Ja viedaju sacyjałohiju. Biełarusy nie za vajnu. Biełarusy za toje, kab dapamahać Rasii i zmahacca suprać fašystaŭ.

Ci možna havaryć «Žyvie Biełaruś»

U chodzie razmovy Piarcoŭ adznačyŭ, što ŭ Biełarusi demakratyja, heta prapisana ŭ Kanstytucyi. Na pytańnie, ci možna havaryć «Žyvie Biełaruś», Piarcoŭ adkazaŭ, što kožny maje prava havaryć što zaŭhodna.

— Dyk za heta karajuć, — zaŭvažyŭ Pavuk.

— Nu, mahčyma, kali heta fašyscki zaklik, vas pakarajuć. Tak havaryli kałabaranty z 1941-ha pa 1944 hod, katoryja tut dzikavali.

— I Janka Kupała pisaŭ u svaim vieršy.

— Vy nie pierakručvajcie, tam inakš skazana. Radok Kupały poŭnaściu pracytujcie. Tam inakš napisana. Ja vašy chady voś hetyja bečebešnyja ŭsie vyvučyŭ na pamiać.

Čamu Łukašenka prymaŭ prysiahu pad bieł-čyrvona-biełym ściaham

Pry adkazie na hetaje pytańnie Piarcoŭ adznačyŭ, što «na toj momant niezakonna (u nas nichto na refierendumie nie pytaŭsia) šuškievičy, kiebičy i astatnija źmianili ściah na bečebe z savieckaha beeseseraŭskaha. U nas nichto nie pytaŭsia. A paśla na refierendumie my źmianili ściah na naš. A na toj momant byŭ dziejnym bečebe-ściah».

Chto zabiŭ Ramana Bandarenku i Zacharanku

U čas razmovy ministr padkreśliŭ, što vystupaje suprać zabojstvaŭ. Kali Pavuk spytaŭsia, čamu ŭ takim vypadku ŭ 2020-m adbyvalisia zabojstvy ŭdzielnikaŭ pratestaŭ, i nahadaŭ pra vypadak z Ramanam Bandarenkam, to pačuŭ adkaz:

— U nas kožny dzień u krainie adbyvajecca šmat [vypadkaŭ] chulihanstva, zabojstvaŭ i inšych złačynstvaŭ. Chto zabiŭ vašaha Ramana Bandarenku? A chto zabiŭ šmat inšych ludziej u našaj krainie? U vyniku niaščasnych vypadkaŭ, zdareńniaŭ i chulihanstva? Vy možacie na heta adkazać?

— Dzie palityčnyja kankurenty Łukašenki? Čamu zabity Zacharanka, Zavadski, Krasoŭski?

— Ja nie viedaju, dzie Zacharanka, Krasoŭski. Ja pra heta ničoha nie viedaju. Mianie ŭ toj čas nie było chiba na śviecie. Moža, i byŭ.

Były ministr unutranych spraŭ Juryj Zacharanka i biznesmien Anatol Krasoŭski źnikli bieź viestak u 1999 hodzie. Ministru Piarcovu tady było 25 hadoŭ (jon naradziŭsia ŭ 1974).

Čytajcie jašče:

«Z čaho pačynajecca Rodzina» — novaja pieśnia «Krasnaj Zieleni»

«Rudabielskuju pakazuchu» pryznali ekstremisckim farmiravańniem

«A prysiažnyja ŭ vas chto?» Što za videa, paśla jakoha na błohiera Pavuka zaviali novuju kryminałku

Antoś Župran

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH