Fota: ms-group.com.ua
Biarezikaŭ pamior 14 červienia, pra heta paviedamiła pravaabarončamu prajektu «OVD-Infa» advakat Iryna Hak. Pavodle jaje słoŭ, za dzień da hetaha jana zafiksavała ŭ Biarezikava ślady ad elektrašokiera (fatahrafiju śladoŭ na ciele aktyvista publikuje «OVD-Infa»), a sam jon skardziŭsia na pahrozy z boku palicejskich, jak piša Bi-bi-si.
Pavodle źviestak Hak, z pačatku maja sud trojčy pryznačaŭ aktyvistu administracyjnyja aryšty pavodle artykułaŭ ab drobnym chulihanstvie i niepadparadkavańni supracoŭnikam palicyi.
Sa słoŭ abaroncy, 10 maja ŭ kvateru da Biarezikava pryjšli siłaviki, praviali ahlad, jaki «faktyčna byŭ pieratrusam», i nibyta złamali jamu rebry. Paśla hetaha na jaho skłali pratakoł ab niepadparadkavańni palicyi i aryštavali na 10 sutak.
21 maja Biarezikaŭ pavinien byŭ vyjści sa śpiecpryjomnika, adnak jaho abvinavacili ŭ drobnym chulihanstvie i znoŭ adpravili pad administracyjny aryšt na 10 sutak.
31 maja sud treci raz adpraviŭ aktyvista pad aryšt — znoŭ pa artykule ab chulihanstvie. Jak śćviardžaje Hak, Biarezikaŭ raskazvaŭ joj, što pierad sudom supracoŭniki palicyi vyvozili jaho za horad, dzie katavali elektrašokieram i patrabavali admovicca ad advakata.
U razmovie z «Miedyjazonaj» Hak taksama paviedamiła, što Biarezikaŭ skardziŭsia na cisk, hvałt i pahrozy z boku siłavikoŭ na ŭsich spatkańniach ź joj.
Advakat miarkuje, što padstavaj dla pieraśledu aktyvista mahło stać toje, što jon rasklejvaŭ u horadzie ŭlotki ŭkrainskaha prajekta «Chaču žyć». Prajekt drukuje zvaroty rasijskim vajskoŭcam ab zdačy ŭ pałon.
Biarezikaŭ pavinien byŭ vyjści na volu ŭ čaćvier, 15 červienia, adnak u sieradu, pa słovach Hak, jana ŭbačyła ŭ dvary śpiecpryjomnika mašynu chutkaj dapamohi, u jakuju zanosili cieła jaje padabaronnaha.
U śpiecpryjomniku zajavili, što Biarezikaŭ ździejśniŭ suicyd.
Paviedamlajecca, što suprać Biarezikava nibyta źbiralisia raspačać kryminalnuju spravu pavodle artykuła ab dziaržaŭnaj zdradzie.
Paśla pieršaha zatrymańnia Biarezikava adpravili na «karusielnyja» aryšty, jakija apošnim časam časta papiaredničajuć raspačynańniu spraŭ ab dziaržaŭnaj zdradzie.
