Miesca, dzie pavinna raźmiaścicca pasolstva. Fota: Rod McGuirk / AP
Premjer-ministr Aŭstralii Entani Ałbaniz zajaviŭ, što ŭrad maje namier zabłakavać budaŭnictva novaha rasijskaha pasolstva pobač z parłamientam krainy praz pahrozu nacyjanalnaj biaśpiecy, piša Bi-bi-si.
Rasija z 2008 hoda aranduje ŭčastak prosta kala budynka Aŭstralijskaha parłamienta ŭ Kanbiery: tam płanavałasia raźmiaścić novy budynak pasolstva. U chodzie praciahłaj sudovaj sprečki ŭłady Aŭstralii śćviardžali, što ŭčastak dla budaŭnictva nie vykarystoŭvajecca.
Ałbaniz zajaviŭ, što paśla atrymańnia rekamiendacyj ad raźviedvalnych słužbaŭ buduć pryniatyja zakony, jakija błakujuć budaŭnictva pa mierkavańniach nacyjanalnaj biaśpieki.
«Urad atrymaŭ vielmi vyraznyja rekamiendacyi pa biaśpiecy ŭ dačynieńni da ryzyki, jakuju ŭjaŭlaje novaja rasijskaja prysutnaść tak blizka da budynka parłamienta», — skazaŭ jon žurnalistam.
Aŭstralija nie zabaraniaje Rasii mieć dypłamatyčnaje pradstaŭnictva na svajoj terytoryi, a tolki choča, kab novaje pasolstva nie znachodziłasia pobač z parłamientam.
Ałbaniz skazaŭ, što čakaje reakcyi z boku rasijskich dypłamataŭ u Aŭstralii, jakija raniej pahražali zmahacca z hetaj zabaronaj praz sud.
«My nie čakajem, što Rasija ŭ stanie kazać pra mižnarodnaje prava, uličvajučy, što jana adchilaje jaho tak paśladoŭna i tak nachabna svaim uvarvańniem va Ukrainu», — skazaŭ premjer.
Ambasada Rasii raniej zajaŭlała, što jana maje namier zaviaršyć budaŭnictva, niahledziačy na piarečańni ŭładaŭ Aŭstralii.
Z pačatku vajny Aŭstralija dała Ukrainie vajskovuju dapamohu i ŭviała sankcyi suprać sotniaŭ rasijskich fizičnych i jurydyčnych asob.
