Alaksandr Łukašenka naviedaŭ 25 lutaha 2022 hoda Minski navukova-praktyčny centr chirurhii, transpłantałohii i hiematałohii
Havorka idzie pra takijskuju niekamiercyjnuju arhanizacyju «Padtrymka pacyjentaŭ ź ciažkimi zachvorvańniami». U 2021—2022 hadach jana adpraviła ŭ Biełaruś troch pacyjentaŭ ź Japonii i atrymała za pasłuhi bolš za 130 młn ijen (kala 1 młn dalaraŭ). Dyrektar NKA 62-hadovy Chiramičy Kikučy (Hiromichi Kikuchi) byŭ aryštavany 7 lutaha 2023 hoda pa padazreńni ŭ parušeńni zakona ab pierasadcy orhanaŭ. Palicyja kanfiskavała ŭ źviazanych z NKA asob śpis sa 150 proźviščami, jakija byli zacikaŭleny ŭ apieracyi pa transpłantacyi.
Na hety momant Kikučy padazrajuć u arhanizacyi transpłantacyi piečani 40-hadovamu mužčynu, jaki paźniej pamior. Śćviardžajecca, što Kikučy pryniaŭ miery biez dazvołu Ministerstva achovy zdaroŭja Japonii. Stan hetaha mužčyny pahoršyŭsia paśla apieracyi pa pierasadcy ŭ lutym minułaha hoda, i jon pamior u listapadzie 2022 hoda paśla druhoj transpłantacyi ŭ Japonii. Za pasłuhi NKA mužčyna zapłaciŭ 33000000 ijen.
Jašče adzin 45-hadovy pacyjent zapłaciŭ kala 85 młn ijen i pajechaŭ u Biełaruś u mai minułaha hoda. Chacia 1 vieraśnia jamu zrabili apieracyju pa pierasadcy nyrki i piečani, u jaho raźviŭsia pierytanit, vyklikany bakteryjami, i 28 vieraśnia 2022 hoda jon pamior.
Krynica haziety śćviardžaje, što mužčyna pryjšoŭ u ofis NKA, tamu što z-za abvastreńnia cyrozu jamu spatrebilisia apieracyi pa pierasadcy piečani i nyrki. Jon daviedaŭsia ab dziejnaści NKA praź jaje veb-sajt. Pakazaŭšy fatahrafiju biełaruskaj balnicy (u artykule nie paznačana nazva balnicy, ale adznačajecca, što heta dziaržaŭnaja klinika), Kikučy parekamiendavaŭ jamu zrabić apieracyju pa transpłantacyi sa słovami nakštałt «Vy možacie być špitalizavany va ŭniviersiteckuju balnicu paśla viartańnia ŭ Japoniju».
Mužčyna pieravioŭ 3 młn ijen u jakaści avansu i 82 młn ijen u jakaści zakładu na rachunak arhanizacyi i adpraviŭsia ŭ Biełaruś pad kiraŭnictvam NKA. Spačatku ŭ špitali skazali, što apieracyja prajšła paśpiachova, ale paźniej zajavili, što jahony stan rezka źmianiŭsia. Havorać, što donaram orhanaŭ byŭ pamierły miascovy žychar. Supracoŭnik balnicy paviedamiŭ The Yomiuri Shimbun, što stan pacyjenta ŭskładniŭsia z-za šmatlikich zachvorvańniaŭ paśla pieraniesienaj apieracyi pa transpłantacyi.
Pa słovach lekaraŭ-transpłantołahaŭ Japonskaha tavarystva transpłantołahaŭ, adnačasovaja transpłantacyja niekalkich orhanaŭ moža pryvieści da rezkaha palapšeńnia stanu chvoraha ŭ vypadku pośpiechu, ale apieracyja zajmaje bolš času i źviazana z bolšaj strataj kryvi, što pavialičvaje ryzyku infiekcyi i inšych prablem.
Siarod praapieravanych u Biełarusi troch hramadzian Japonii tolki 50-hadovy mužčyna zastaŭsia žyvy. Jamu była zroblena apieracyja pa pierasadcy nyrki. Za pasłuhu jon zapłaciŭ kala 18500000 ijen, što bolš čym udvaja pieravyšaje rynkavuju canu, paviedamili ŭ palicyi.
Zdymak z fotarepartažu pra naviedvańnie Łukašenkam Minskaha navukova-praktyčnaha centra chirurhii, transpłantałohii i hiematałohii
Pośpiechami ŭ halinie transpłantałohii ŭ lutym 2022 hoda ŭ prysutnaści Alaksandra Łukašenki vychvalaŭsia dyrektar Minskaha navukova-praktyčnaha centra chirurhii, transpłantałohii i hiematałohii Aleh Rumo.
Mienavita hety centr pravodzić navukovyja daśledavańni pa ŭsich napramkach sučasnaj miedycyny, zychodziačy z napracovak, źviazanych z transpłantałohijaj. Za pieryjad z 2008 pa 2021 hod było vykanana bolš za 3 tysiačy transpłantacyj orhanaŭ. Pa słovach Rumo, u 2021 hodzie centr zarabiŭ na zamiežnych pacyjentach bolš za 10 młn dalaraŭ. Čynoŭnik asabliva adznačaŭ klijentaŭ ź Izraila i Japonii.
