Kamiersant
U rasparadžeńni «Kamiersanta» akazaŭsia list ad 18 listapada, u jakim KSZI (u jaho ŭvachodziać, naprykład, Danone, Mars, Metro, PepsiCo, Sanofi, Coca-Cola, Unilever) papiaredziŭ pieršaha vice-premjera RF Andreja Biełavusava pra ryzyki, jakija ŭźnikli ŭ suviazi ź mihracyjnym kryzisam na miažy ES i Biełarusi. Praz hetuju miažu prachodzić kala 10% rasijskaha impartu ŭ naturalnym vyražeńni, uklučajučy charčovyja i niecharčovyja tavary, u tym liku pieršaj nieabchodnaści, miedvyraby, syravinu, kampanienty, upakoŭku i abstalavańnie, havorycca ŭ liście. Bolš za 90% pastavak prypadaje na aŭtamabilny transpart.
Na KPP «Babroŭniki» na miažy z Polščaj utvarylisia čerhi z hruzavikoŭ daŭžynioj bolš za 25 km, čas pierachodu pavialičyŭsia da 80 hadzin, tady jak dzień prastoju adnoj mašyny abychodzicca minimum €500, havorycca ŭ liście.
Pa dadzienych KSZI, na alternatyŭnych abjaznych maršrutach praz Łatviju abo Litvu taksama pačali ŭtvaracca zatory, pryčym u narmalnych umovach prajezd pa hetych darohach pavialičvaje vydatki minimum na €300 na adnu mašynu. Vykarystańnie inšaha transpartu, adznačajuć u KSZI, spałučana ź istotnym pavieličeńniem koštu dastaŭki.
«Zachavańnie situacyi, jakaja skłałasia, moža istotnym čynam paŭpłyvać na łancuhi pastavak i dastupnaść tavaraŭ dla nasielnictva, asabliva, uličvajučy pavieličeńnie hruzaabarotu i pavyšany popyt na pradukcyju napiaredadni navahodnich śviataŭ»,— papiaredžvajuć u KSZI.
Biznes prosić Andreja Biełavusava pasadziejničać zabieśpiačeńniu mižviedamasnaj kaardynacyi i padrychtoŭcy da pavieličeńnia hruzapatokaŭ praź miažu RF z Łatvijaj.
U pres-słužbie ŭrada zajavili «Kamiersantu», što list pakul nie pastupaŭ. U Mintransie i Minpramhandlu kamientaryjaŭ nie dali.
Krynica ŭ bujnoj handlovaj sietcy kaža, što ŭ kampanii na KPP «Babroŭniki» staić niekalki aŭtamabilaŭ. Pakul situacyja nie krytyčnaja, ale prahnazavać dalejšaje raźvićcio i nastupstvy składana, adznačaje jon. Z zatrymkami ŭ prachodžańni hruzaŭ sutyknułasia sietka «Lenta», paćvierdziŭ jaje pradstaŭnik, admoviŭšysia ŭdakładnić detali.
Dyrektar pa pravavych pytańniach i karparatyŭnych adnosinach AB InBev Efes (BUD, Stella Artois, Corona Extra) Araz Durdyjeŭ kaža, što situacyja ŭžo vyklikała niedachop ruchomaha składu na hetym kirunku, a ŭ pierśpiektyvie moža paciahnuć deficyt pradukcyi, pieraboi z pastaŭkami i rost kančatkovaj cany dla spažyŭca. U PepsiCo (brendy Pepsi, Lay's, J7, «Domik v dierievnie» i inš.) adznačajuć, što situacyja z prachodžańniem miažy praciahvaje paharšacca, rastuć zatory, što pahražaje razryvami ŭ łancuhach pastavak. Vykanaŭčy dyrektar «Ruscharčsajuza» Dźmitryj Vostrykaŭ dadaje, što składanaści z łahistykaj niehatyŭna adbivajucca na rentabielnaści pastaŭščykoŭ z-za prastoju aŭtatranspartu.
Kiraŭnik firmy HK «Saŭtransaŭta» Uładzimir Cian kaža, što samo pa sabie pieranakiravańnie hruzaŭ na inšy KPP nie vyrašyć prablemu: z ulikam dziejučych mier kantrolu i mahčymaściaŭ infrastruktury prapusknaja zdolnaść zastajecca abmiežavanaj.
Pa słovach krynicy na rynku, biznes u dadzienym vypadku spadziajecca «na palityčnaje rašeńnie pytańnia».
Miž tym premjer Polščy Matevuš Maraviecki 21 listapada papiaredziŭ, što kraina hatovaja da poŭnaha zakryćcia miažy, tranzitu i handlu ź Biełaruśsiu. Vykanaŭčy dyrektar Nacyjanalnaha sajuza ekśpiertaŭ u śfiery transpartu i łahistyki Volha Fiadotkina kaža, što z ulikam maksimalna šyrokaha pieraliku tavaraŭ, jakija pieravoziacca, škodu ad mahčymaha poŭnaha zakryćcia miažy dla rasijskich spažyŭcoŭ i biźniesu «navat ujavić składana».
