Džymi Łaj zasnavaŭ štodzionnuju hazietu Apple Daily u 1995 hodzie. U jaho pieršym redakcyjnym artykule było napisana: «My pierakananyja, što hankonhcy, jakija pryvykli da svabody, nie buduć maŭčać padčas nieabhruntavanych abmiežavańniaŭ i niespraviadlivaha staŭleńnia, bo hankonhcy naradžajucca z prahaj da svabody».
Apple Daily staŭ samaj papularnaj krynicaj navin. Vydańnie vystupała za vierchavienstva prava, svabodu słova i svabodny handal, piša The Wall Street Journal.
Kab zakryć hazietu, Kitaj spasłaŭsia na Zakon ab nacyjanalnaj biaśpiecy, pa jakim užo byli represavanyja sotni ludziej.
Na minułym tydni bolš za 500 uzbrojenych supracoŭnikaŭ palicyi ŭvarvalisia ŭ ofisy vydańnia. Kiraŭnictva haziety aryštavali. Bolš za toje, biez sudovaha raźbiralnictva kitajskija ŭłady zabłakavali rachunki i zamarozili aktyvy kampanii. Praz heta kampanija nie moža płacić zarobki supracoŭnikam i adpaviedna praciahvać pracu.
Džymi Łaj, zasnavalnik haziety, byŭ aryštavany jašče letaś i ciapier adbyvaje 20-miesiačny turemny termin za ŭdzieł u niesankcyjanavanym mierapryjemstvie.
Zakon ab nacyjanalnaj biaśpiecy ŭ Kitai daje mahčymaść słužbovaj asobie kvalifikavać dziejnaść luboj kampanii jak złačynstva, navat kali nichto nie byŭ asudžany ci abvinavačany ŭ pravaparušeńni. Ministr biaśpieki Hankonha apraŭdvaje dziejańni pravaachoŭnych orhanaŭ tym, što, pa jaho słovach, materyjały, jakija publikavała Apple Daily štodzionna parušała zakon ab biaśpiecy. Aryštavanych žurnalistaŭ i kiraŭnikoŭ vydańnia vyklikajuć na dopyty nakont bolš za 100 artykułaŭ.
Toje, jak kitajskija ŭłady padarvali funkcyjanavańnie rynkaŭ akcyj kampanii, pravoŭ ułasnaści i kantraktaŭ, źjaŭlajecca papiaredžańniem dla inšych kampanij, jakija viaduć biznes u Hankonhu. Heta nie tolki padryŭ svabody presy, ale i demanstracyja taho, što moža zdarycca ź luboj inšaj kampanijaj, kali ŭłady spasyłajucca na razmytyja pałažeńni Zakona ab nacyjanalnaj biaśpiecy.
