Siarhiej Cichanoŭski, Arciom Sakaŭ i Dźmitryj Papoŭ u pamiaškańni SIZA, dzie budzie prachodzić sudovy praces.
Kali abvinavačanych zavodzili ŭ zału, Mikałaj Statkievič vyhuknuŭ «Žyvie Biełaruś!»
Ihar Łosik, Siarhiej Cichanoŭski, Mikałaj Statkievič, Uładzimir Cyhanovič, Arciom Sakaŭ, Dźmitryj Papoŭ
Sudovy praces nad Siarhiejem Cichanoŭskim, Mikałajem Statkievičam, Iharam Łosikam, błohierami Uładzimiram Cyhanovičam, Dźmitryjem Papovym i Arciomam Sakavym pačniecca prykładna praz hod paśla zatrymańnia kožnaha ź ich. Cichanoŭskaha zatrymali 29 maja 2020 hoda, Statkieviča — 31 maja, Łosika — 25 červienia.
Uvieś hety čas jany ŭtrymlivalisia ŭ SIZA Minska i Žodzina, a ŭ Homiel trapili pierad samym pačatkam suda. Pieršapačatkova paviedamlałasia, što što praces maje prajści ŭ Homielskim abłasnym sudzie. Adnak u vyniku rodnym abvinavačanych stała viadoma, što sud budzie nie tolki zakryty, ale da taho ž projdzie ŭ budynku SIZA № 3 Homiela.
Radyjo Svaboda piša, što ŭ spravie ad 110 da 140 tamoŭ.
Svaboda taksama źviartaje ŭvahu, što dakładna navat nie viadoma, u čym abvinavačvajuć kožnaha z padsudnych. Advakaty ŭsich ich pad padpiskaj ab nierazhałošvańni i nie mohuć raskryvać detali materyjałaŭ spravy i budučaha pracesu. U vypadku Ihara Łosika advakat navat nie moža nazvać treci artykuł abvinavačańnia, jaki Łosiku dadali ŭviesnu.
Niezrazumieła taksama, što źviazvaje niekatorych abvinavačanych. Žonka Mikoły Statkieviča Maryna Adamovič kazała, što z usich piaci čałaviek, z kim Statkievič akazaŭsia na adnoj łavie padsudnych, jon asabista znajomy tolki ź Siarhiejem Cichanoŭskim. I to ich znajomstva nielha nazvać blizkim. Ihar Łosik taksama da suda nie mieŭ kantaktaŭ ź inšymi abvinavačanymi. Adnosna blizkija kantakty abjadnoŭvajuć tolki Siarhieja Cichanoŭskaha i Dźmitryja Papova z Arciomam Sakavym.
Viadoma taksama, što ŭ kožnaha z padsudnych abvinavačańnie «svajo». Mienš za ŭsio «pretenzij» u śledstva akazałasia da Mikoły Statkieviča. Pa słovach Maryny Adamovič, jamu pakinuli tolki adzin artykuł KK — 293, arhanizacyja masavych biesparadkaŭ. Adnak, u adroźnieńnie ad inšych fihurantaŭ spravy, Mikoła Statkievič raniej užo byŭ asudžany, što robić jaho «recydyvistam».
