Rada ES na ŭzroŭni ministraŭ zamiežnych spraŭ zaćvierdzić u paniadziełak 4-y pakiet sankcyj suprać Biełarusi ŭ dačynieńni da 86 asob i kampanij. Pra heta zajaviŭ u paniadziełak viarchoŭny pradstaŭnik ES pa zamiežnych spravach i palitycy biaśpieki Žazep Barel, piša TASS.
«My ŭzhodnim siońnia čaćviorty pakiet sankcyj suprać Biełarusi. Novyja sankcyi zakranuć 86 fizičnych asob i kampanij», — paviedamiŭ jon. U svaju čarhu kiraŭnik MZS Finlandyi Pieka Chaavista pa prybyćci na sustreču rastłumačyŭ, što ES prymie sankcyi za parušeńni pravoŭ čałavieka i cisk na apazicyju, a taksama dadatkovyja sankcyi za prymus da pasadki samalota Ryanair.
Pa słovach Barela, ekanamičnyja sankcyi ES suprać Biełarusi buduć razhledžany na samicie ES 24-25 červienia i zaćvierdžany paśla jaho. Barel paviedamiŭ, što ekanamičnyja sankcyi ES buduć nakiravany na biełaruski ekspart u ES.
«Siońnia na sustrečy ŭ Luksiemburhu my budziem abmiarkoŭvać Biełaruś pieršym pytańniem. U nas budzie pieršaja sustreča ź biełaruskim lidaram Śviatłanaj Cichanoŭskaj. Jana raskaža pra situacyju ŭ krainie… a zatym my ŭchvalim pakiet novych sankcyj, davoli šyroki pakiet. Jon uklučaje 86 čałaviek i arhanizacyj. Zatym my budziem abmiarkoŭvać ekanamičnyja sankcyi, jakija buduć pradstaŭleny Jeŭrapiejskaj radzie», — skazaŭ Barel.
