Hienieralny sakratar NATA Jens Stołtenbierh admoviŭsia kazać ab raźviedvalnych źviestkach, jakimi mohuć kiravacca krainy aljansu, śćviardžajučy ab datyčnaści Rasii da incydentu z pasadkaj samalota irłandskaj avijakampanii Ryanair u aeraporcie Minska.
U niadzielnym intervju brytanskaj radyjostancyi Times Radio jon zajaviŭ, što nie moža detalova abmiarkoŭvać hety aśpiekt pytańnia, i zhadaŭ tolki dva ŭskosnyja ŭkazańni na toje, što Maskva mahła adyhrać rolu ŭ tym, što adbyłosia.
«Ja nie mahu ŭdavacca ŭ detali z nahody źviestak vyviedki, adnak my viedajem, što Biełaruś i Rasija vielmi ciesna supracoŭničajuć amal va ŭsich śfierach, uklučajučy abaronu pavietranaj prastory. Akramia taho, Rasija — adna ź niamnohich krain, što nie asudzili całkam nieprymalny fakt prymusu da pasadki samalota, jaki lacieŭ z Afin — stalicy adnoj krainy, što źjaŭlajecca členam NATA, — u stalicu inšaha člena NATA — Vilniu», — skazaŭ Stołtenberh, adkazvajučy na pytańnie ab tym, ci ličyć jon Maskvu «ŭ jakoj-niebudź miery adkaznaj» za toje, što adbyłosia.
Kiraŭnik aljansu taksama paŭtaryŭ, što adnosiny pamiž NATA i RF u sapraŭdny momant znachodziacca «ŭ samoj nizkaj kropcy z momantu zakančeńnia chałodnaj vajny». Jon patłumačyŭ heta tym, što Rasija demanstruje hatoŭnaść prymianiać vajennuju siłu ŭ dačynieńni da susiednich dziaržaŭ. Stołtenberh taksama śćviardžaŭ, što RF robić sproby ŭpłyvać na demakratyčnyja pracesy ŭ krainach aljansu, unosiačy pamiž imi raskoł.
