Čamu siłaviki atakavali Tut.by?
Kamitet dziaržaŭnaha kantrolu paličyŭ, što kiraŭnictva TAA «Tut baj miedyja» parušyła padatkovaje zakanadaŭstva. Sprava ŭ tym, što ŭ 2019 hodzie kampaniju zarehistravali jak rezidenta Parka vysokich technałohij. Paśla hetaha kampanija stała płacić mienšyja padatki. Ciapier ža KDK vyrašyŭ, što «Tut.by atrymlivaŭ vyručku, nie abumoŭlenuju dziejnaściu, dazvolenaj dla rezidentaŭ PVT». Tym samym, maŭlaŭ, dziaržavie byli naniesienyja straty ŭ asabliva bujnym pamiery.
Kali heta nibyta ekanamičnaja sprava, to čamu Tut.by zabłakavali?
Mininfarm u hety ž dzień zajaviŭ, što Tut.by raspaŭsiudžvaŭ infarmacyju ad fondu salidarnaści «Bajsoł». Toj nie maje rehistracyi ŭ Biełarusi (choć zarehistravany za miažoj). Čynoŭniki paličyli, što hetaha dastatkova dla błakiroŭki.
Chto staŭ fihurantam spravy?
U paviedamleńni KDK zhadvajucca dyrektar TAA «Tut baj miedyja» Ludmiła Čekina i hałoŭny buchhałtar Anžeła Asad. Im inkryminujecca ŭchileńnie ad spłaty padatkaŭ u asablivaj bujnym pamiery — pakarańnie ad chimii na paŭhoda da kałonii na 7 hadoŭ.
Pisali, što pieratrusy prachodziać doma ŭ mnohich žurnalistaŭ. A što ź imi?
Niezrazumieła. Niekatoryja ź ich (u tym liku hałoŭny redaktar Maryna Zołatava i palityčny žurnalist Alena Tałkačova) paśpieli paviedamić, što majuć status śviedak, paśla čaho ich uvieźli na dopyty. U inšych (redaktary Hanna Rudenka i Volha Saŭkiŭ) kanfiskavali techniku i skazali čakać paviestku. Tyja supracoŭniki, chto ad ranicy znachodziŭsia ŭ ofisie, pa-raniejšamu nie vychodziać na suviaź.
DFR prychodziŭ i da kulturołaha Julii Čarniaŭskaj, udavy zasnavalnika Tut.by Juryja Zisiera. Joj stała drenna, jana znachodzicca ŭ balnicy.
Chto jašče trapiŭ pad udar?
Siłaviki pryjšli ŭ šerah biznesaŭ, afilijavanych z Tut.by. Heta pravajdar Hoster.by, techničny apieratar biełaruskaj internet-zony, heta najbujniejšaja aŭtabarachołka krainy Av.by, heta servisy Rabota.by, Tam.by. Ich kiraŭniki taksama zatrymanyja, ich pravavy status pakul nieviadomy.
Jak ciapier budzie pracavać Tut.by?
Stvarać lusterki zabłakavanaha sajta pakul vyhladaje biessensoŭnym — jany błakujucca adrazu ž.
Tut.by možna čytać u telehramie i ŭ instahramie:
- https://t.me/tutby_official
- https://www.instagram.com/tutbylive/
Kamientar «Našaj Nivy»: Da čaho pryviadzie razhrom Tutbaja? Čatyry nastupstvy
