Fota The Guardian
Na praciahu dziesiacihodździa manachi z abactva Notr-Dam-de-Sen-Remi, što ŭ bielhijskim horadzie Rašfory, zmahalisia z najbujniejšym u śviecie vytvorcam vapny Lhoist Group za čyściniu miascovaj kryničnaj vady, jakuju manachi vykarystoŭvajuć dla varki svajho znakamitaha trapisckaha piva, piša The Guardian.
Pieršyja zhadki pra pivavarniu ŭ Rašfory źjavilisia ŭ kancy ChVI stahodździa, a ŭ XIX stahodździ manachi-trapisty adnavili vytvorčaść piva ŭ manastyry. Heta prynosić abactvu značny dachod: hadavaja vyručka ad prodažu piva składaje kala 14 miljonaŭ jeŭra.
Dziesiać hadoŭ tamu kampanija Lhoist Group vyrašyła pahłybić krejdavy karjer, raźmieščany niedaloka ad abactva. Pahłybleńnie karjera patrabuje adpampoŭvańnia padziemnaj vady pad im. Heta paniziła b naturalny ŭzrovień hruntavoj vady, i krynica, jakaja znachodzicca na terytoryi abactva vysachła by. Kampanija prapanoŭvała zamianić naturalny ściok hruntavoj vady ŭ bok abactva sistemaj pompaŭ, ale manachi ličać, što heta paŭpłyvała b na jakaść i smak vady, a adpaviedna i na piva.
Jurysty kampanii sprabavali pierakonvać, što vada nie naležyć abactvu, pakul nie ciače pa ŭłasnaści manastyra. Adnak Notr-Dam-de-Sen-Remi pakazaŭ sudu dakumient 1833 hoda, jaki zabaraniaje źmianiać ciačeńnie krynicy, što znachodzicca na terytoryi abactva. Apielacyjny sud paćvierdziŭ, što ŭ takim vypadku ŭładalnik karjera nie maje prava źmianiać ściok vady, jakaja siłkuje krynicu.
