Uładzimir Kniha, Jaŭhien Raźničenka, Dźmitryj Furmanaŭ. Fota: spring96.org
Dźmitryja Furmanava, Jaŭhiena Raźničenku i Uładzimira Knihu abvinavačvajuć u aktyŭnym udziele ŭ dziejańniach, jakija hruba parušajuć hramadski paradak 29 traŭnia ŭ Hrodnie (č.1 art. 342 KK). Akramia hetaha, Raźničenku i Knihu abvinavačvajuć u hvałtoŭnych dziejańniach u dačynieńni da milicyjantaŭ (art. 364 KK). Abvinavačanyja nie pryznajuć svajoj viny pa ŭsich epizodach.
Spravu razhladaje sudździa Kastryčnickaha rajona Hrodna Volha Biekušava. Dziaržaŭnaje abvinavačvańnie pa spravie padtrymlivaje staršy pamočnik prakurora Hrodna Mikita Myśliviec. Pa spravie pryznanyja čatyry paciarpiełyja milicyjanty: učastkovyja Uładzimir Kazłoŭski i Alaksandr Chvalenia, supracoŭniki AMAPa Rachunok i Budnik.
U paniadziełak, 17 traŭnia, prakuror Myśliviec zajaviŭ chadajnictva ab prahladzie zapisaŭ strymaŭ Siarhieja Cichanoŭskaha ź jaho sustrečy z padpisčykami ŭ Hrodnie 24 i 28 krasavika. Prakuror sam znajšoŭ zapis u jutubie, zapisaŭ na dysk i paprasiŭ dałučyć heta da materyjałaŭ spravy i vyvučyć u zali suda. Advakaty byli suprać zadavalnieńnia chadajnictva, bo heta nie datyčycca padziejaŭ 29 traŭnia i dysk pracesualna nie aformleny, ale sudździa Biekušava zadavoliła chadajnictva. U sudzie prahladzieli dva videa, dzie vystupali miascovyja aktyvisty Mikałaj Salanik, Łaŭrencieŭ i inšyja haradziency. U hetym videa taksama zafiksavana, jak Cichanoŭski daryć haradziencam tapak i kaža, što heta zbroja suprać tarakana. Taksama jon kaža: «Kali nie dazvalajuć brać viły, to biarom tapki!» Nieznajomy haradzieniec kaža, što «hałoŭnaja zadača ŭ hety hodzie — zabić tarakana». Cichanoŭski adkazvaje, što hałoŭnaje — «viarnucca da demakratyčnych kaštoŭnaściaŭ i vybaraŭ».
Taksama ŭ sudzie jašče raz abjavili pratakoł śledčaha ekśpierymientu ad 3 červienia 2020 hoda ab abstavinach atrymańnia cialesnych paškodžańniaŭ kapitanam Budnikam. Śledčy ekśpierymient pravodziŭsia na statystach RASK u Hrodna. Akramia hetaha, u sudzie začytali list Lidzii Jarmošynaj ad 23 červienia 2020 hoda, dzie havorycca, što ŭsie členy inicyjatyŭnaj hrupy Śviatłany Cichanoŭskaj atrymali paśviedčańni. U sudzie byli začytanyja dva raparty ŭčastkovych Kazłoŭskaha i Chvaleni ad 29 traŭnia. Advakaty piarečyli, bo hetyja raparty nie zarehistravanyja naležnym čynam u Adzinaj knizie pastupleńnia paviedamleńniaŭ. Sud nie pryniaŭ da ŭvahi piarečańni advakataŭ. Na hetym sudovaje śledstva, jakoje doŭžyłasia piać miesiacaŭ, skončana. Baki prystupili da sprečak.
Prakuror Mikita Myśliviec zajaviŭ, što, niahledziačy na toje, što nichto z abvinavačanych nie pryznaje svajoj viny, ličyć, što vina ŭ sudzie traich fihurantaŭ «spravy Cichanoŭskaha» pa č. 1 art. 342, a Knihi i Raźničenki — jašče i pa art. 364 Kryminalnaha, całkam dakazanaja i paprasiŭ sud pakarać Dźmitryja Furmanava — dvuma hadami kałonii va ŭmovach ahulnaha režymu, Jaŭhiena Raźničenku — tryma z pałovaj hadami kałonii va ŭmovach ahulnaha režymu, Uładzimira Knihu — čatyrma hadami kałonii strohaha režymu. Z abvinavačvańniaŭ pa art. 364 KK Knihi i Raźničenki vyklučyli matyŭ pomsty pomsty za vykanańnie słužbovaj dziejnaści.
***
Nahadajem, 27 krasavika ŭ sudzie Leninskaha rajona Hrodna ahučyli prysud pa kryminalnaj spravy suprać 38-hadovaha kiroŭcy aŭtadoma «Strana dla žiźni» sa Starych Daroh Alaksandra Aranoviča. Sudździa Alena Piatrova paličyła vinu palitviaźnia ŭ ździajśnieńni złačynstvaŭ, praduhledžanych č. 1 art. 342 i č. 2 art. 13 art. 293 KK, dakazanaj i pakarała Aranoviča šaściu hadami pazbaŭleńnia voli va ŭmovach uzmocnienaha režymu.
