Kaho sudziać u hety raz?
Na hety raz na łavie padsudnych — Raman Dziamidovič, Maryna Darašuk, Viktoryja Karalčuk, Alesia Kramčanina, muž i žonka Andrej i Palina Laško, Śviatłana Marčuk, pružanski paet i pčalar Mikałaj Papieka, palitźniavoleny syn i baćka Arsienij i Jaŭhien Siniaki, palitźniavolenyja 46-hadovy Raman Jachin i 34-hadovaja Volha Hłušań.
Pavodle viersii abvinavačvańnia, kožny z 12 abvinavačanych u hrupie ź inšymi asobami naŭmysna ŭziaŭ aktyŭny ŭdzieł u hrupavych dziejańniach, jakija hruba parušajuć hramadski paradak. Ich dziejańni byli spałučanyja ź vidavočnym niepadparadkavańniem zakonnym patrabavańniam pradstaŭnikoŭ ułady, paciahnuli parušeńnie pracy transpartu, pradpryjemstvaŭ i arhanizacyj. U pryvatnaści, z-za prastoju tralejbusnamu parku była naniesiena škoda 619 rubloŭ 55 kapiejek, aŭtobusnamu — 40 rubloŭ 37 kapiejek.
Akramia taho, na rozny čas pryjšłosia začynicca trom łarkam i restaranu KFC. Paciarpiełym bokam u spravie vystupaje KUTP «Tralejbusny park» i AAT «Brescki Aŭtobusny park». Abvinavačvańnie vystavili pa častcy 1 artykuła 342.
Padčas vyśviatleńnia asoby abvinavačanych Mikałaj Papieka paprasiŭ sudździu razmaŭlać ź im na biełaruskaj i paviesiŭ na siabie «šparhałku» z cytataj z zakona «Ab movie». «Vy nie ŭ teatry!» — adkazaŭ sudździa i praciahnuŭ vieści słuchańnie na ruskaj movie.
Paźniej Papieka zajaviŭ chadajnictva ab advodzie sudździ i dziaržabvinavaŭcy, pakolki jany nie vałodajuć biełaruskaj movaj. Jaho padtrymała jašče adna abvinavačanaja. Taksama Papieka paprasiŭ źmianić mieru strymańnia dla troch abvinavačanych, jakija znachodziacca pad vartaj na padpisku ab niavyjeździe. Chadajnictva padpisali inšyja abvinavačanyja. Pra heta ž chadajničała dla siabie i padsudnaja Hłušań. Adnak dziaržabvinavaŭca zajaviŭ, što dla zadavalnieńnia chadajnictva niama padstavaŭ.
Sud pajšoŭ na pierapynak da 12:00, kab vyrašyć, ci zadavalniać zajaŭlenyja chadajnictvy. Paśla pierapynku ŭ prośby da sudu było admoŭlena.
Paśla taho jak dziaržaŭny abvinavaŭca začytaŭ abvinavačvańnie padsudnym, ź im častkova pahadzilisia piać fihurantaŭ spravy. Astatnija nie pryznali vinu.
Zatym sud prystupiŭ da dopytu abvinavačanych. Pieršaj pakazańni davała Alesia Kramčanina. Jana raspaviała, što ŭ toj dzień nie viedała ab tym, što budzie pravodzicca masavaje mierapryjemstva. Kali jana apynułasia na skryžavańni, jaje paklikali na prajeznuju častku. Na jaje dumku, kolkaść ludziej vyhladała, jak śviata z dobrymi namierami, a nie jak ludzi, jakija sabralisia ŭčynić złačynstva.
«Tam było prosta vielmi šmat ščaślivych ludziej!» — zajaviła jana.
Jana svaju vinu pryznała častkova i patłumačyła, što ŭ jaje nie było nijakaha złoha namieru. Vinu jana adčuvaje tolki za pryčynienuju z-za prypynieńnia pracy škodu pradpryjemstvam (aŭtobusny i tralejbusny park, kijoski i kramy).
Viktoryja Karalčuk zajaviła na dopycie, što 13 vieraśnia jana sustrełasia ź siabroŭkami, i jany vyrašyli pajści ŭ kaviarniu. Pa darozie jany ŭbačyli natoŭp ludziej, a dajšoŭšy da skryžavańnia Mašerava i bulvara, vyjšli na prajeznuju častku, dzie była navała ludziej, kab sfatahrafavacca (fota potym vykłali ŭ sacyjalnyja sietki). Potym jany ź siabroŭkami pajšli ŭ kaviarniu, a vyjšaŭšy na vulicu, Viktoryja ŭbačyła mokry asfalt. Sa słovaŭ ludziej jany daviedalisia, što pryjazdžała śpiectechnika.
Potym dapytvali Jaŭhiena Siniaka. U toj dzień jon pryjechaŭ u centr horada ź mikrarajona Rečyca z synam Arsienijem, dzie jany pražyvajuć. Ubačyŭšy natoŭp ludziej, jany dałučylisia da kałony kala pomnika 1000-hodździa ź cikaŭnaści. U karahodzie na skryžavańni bulvara i praśpiekta Jaŭhien, ź jaho słovaŭ, nie prymaŭ udzieł. Ale ličyŭ, što mierapryjemstva nie zabaronienaje, bo tam było niekalki ekipažaŭ DAI.
«Ja dumaŭ, jany nas achoŭvajuć!» — zajaviŭ jon.
Raniej Jaŭhien dvojčy zatrymlivaŭsia za ŭdzieł u masavych mierapryjemstvach. Zatrymali abvinavačanaha i ŭ dzień karahodu. U IČU jon sustreŭ syna Arsienija, ź jakim zhubiŭsia ŭ natoŭpie. Jaŭhien pryznaje, što ŭdzielničaŭ u niesankcyjanavanym masavym mierapryjemstvie, adnak zajaviŭ, što ŭžo adsiedzieŭ 15 sutak za heta.
Palitźniavoleny Raman Jachin rodam z Baku, adnak užo 30 hadoŭ žyvie ŭ Biełarusi. Jon byŭ niekalki razoŭ sudzimy. Bolš za 10 hadoŭ tamu jon pieražyŭ trepanacyju čerapa, zarabiŭ epilepsiju i atrymaŭ treciuju hrupu invalidnaści. 13 vieraśnia jon vyjšaŭ, kab «padtrymać narod». Jon pryznaje, što vychodziŭ na prajeznuju častku ŭ toj dzień. Svaju vinu Jachin pryznaŭ častkova.
Paśla jaho dopytu ŭ sudzie abviaścili pierapynak da 10.00 17 vieraśnia.
Raniej pa hetaj spravie asudzili ŭžo 46 čałaviek: prysudy ad chatniaj chimii da źniavoleńnia ŭ kałonii.
