Sudździa — Julija Hustyr, bok abvinavačvańnia — pamočnik prakurora Maryna Prudnikovič.
Pavodle abvinavačańnia, Anatol Piatroŭ z 20-j hadziny da 23-j hadziny 9 žniŭnia, znachodziačysia ŭ stanie ałkaholnaha apjanieńnia, na praśpiekcie Pieramožcaŭ ad doma 9 da doma 13 uziaŭ udzieł u hrupavych dziejańniach, jakija hruba parušajuć hramadski paradak, što vyjaviłasia ŭ tym, što jon dałučyŭsia da hrupy hramadzian, jakija vykrykvali pravakacyjnyja łozunhi. Taksama Piatrova abvinavacili ŭ tym, što jon uziaŭ piasok z kłumby i kinuŭ jaho ŭ bok supracoŭnikaŭ MUS.
Anatol Piatroŭ całkam pryznaŭ vinu i raskajaŭsia. Padčas dopytu jon raspavioŭ, što 9 žniŭnia pajšoŭ u hości da syna, bo dumaŭ, što ŭ hety dzień u jaho ŭnučki dzień naradžeńnia. Akazałasia, što daty jon pierabłytaŭ, ale ŭsio roŭna ŭ syna jany nakryli stoł i vypili. Zatym Piatroŭ vyrašyŭ prajścisia na Niamihu i zajści ŭ kafe kala kinateatra «Maskva». Tam jon zamoviŭ jašče ałkahol i zakusku. Da jaho padsieŭ čałaviek, i paźniej jany razam vyjšli papalić.
«Ja nie palu, ale było dušna, vyjšaŭ za kampaniju. Tam pabačyli ŭžo šmat ludziej, jany vykrykvali łozunhi, plaskali. Ja nie viedaŭ, čaho jany tam znachodzilisia, palitykaj sam nie cikaviŭsia. Milicyja taksama tam była. Jany zatrymlivali ludziej, bili ich humovymi pałkami. Ja takoha nikoli nie bačyŭ. Dla mianie heta było šokam. Natoŭp pajšoŭ, i ja pajšoŭ za imi. Ja taksama pačaŭ kryčać, kab nie bili ludziej. U dałoni nie plaskaŭ.
Potym uziaŭ ziamlu z kłumby, ale jana vypała z ruk, ja nie zmoh jaje kinuć. Na mianie padziejničaŭ ałkahol i dziejańni natoŭpu. Ja byŭ aburany. Potym zrazumieŭ, što heta biessensoŭna, i syšoŭ».
Dalej Piatroŭ viarnuŭsia ŭ kaviarniu, raspłaciŭsia, zatym pajšoŭ u bok vulicy Kalvaryjskaj, čakaŭ tralejbusa kala «Karony». Tam jon byŭ zatrymany i paźniej asudžany pa artykule 23.34 KaAP (Udzieł u niesankcyjanavanym masavym mierapryjemstvie).
Jon taksama rastłumačyŭ, što ziamloj z kłumby jon nie chacieŭ ni ŭ kaho patrapić, heta chutčej byŭ demanstratyŭny žest.
U jakaści śviedak na sudzie vystupili syn Piatrova i jaho niaviestka. Syn Uładzimir paćvierdziŭ, što 9 žniŭnia baćka byŭ u jaho ŭ haściach i jany pili ałkahol. Kala 20-j hadziny jon pravioŭ baćku na prypynak i pasadziŭ na transpart. Paźniej daviedaŭsia, što baćka zatrymany i znachodzicca na Akreścina. Uładzimir raspavioŭ, što ciapier u baćki prablemy sa słycham i zrokam, znachodzicca ŭ stadyi afarmleńnia invalidnaści.
Niaviestka Śviatłana taksama paćvierdziła pakazańni abvinavačanaha. Jana skazała, što paśla toj sustrečy jany bolš nie razmaŭlali.
Pamočnik prakurora Maryna Prudnikovič adznačyła, što vina Piatrova dakazanaja ŭ poŭnym abjomie pakazańniami samoha abvinavačanaha, śviedak, a taksama piśmovymi materyjałami spravy. Źmiakčalnymi abstavinami jana paprasiła pryznać čystasardečnaje raskajańnie, a taksama ŭličyć uzrost i charaktarystyku abvinavačanaha. Abciažarvajučym — znachodžańnie ŭ stanie ałkaholnaha apjanieńnia. Dziaržabvinavaŭca prapanavała prysudzić Piatrovu try hady abmiežavańnia voli biez nakiravańnia va ŭstanovu adkrytaha typu.
U apošnim słovie Anatol Piatroŭ paprasiŭ stroha jaho nie karać i dać jamu prosta «spakojna dažyć».
U vyniku — try hady abmiežavańnia voli biez nakiravańnia va ŭstanovu adkrytaha typu (h. zn. chatniaja chimija).
