Fota Pixabay.
Što zrabić suśvietnamu technałahičnamu hihantu, jaki choča padłučyć da sietki miljardy svaich pryład, ale nie žadaje addavać vializnyja hrošy na supracoŭnictva z apieratarami suviazi ci kabielnymi kampanijami? Amazon i Apple vyrašyli ŭstaloŭvać sistemy biazdrotavych sietak u pryłady, jakija nabyli ich klijenty, kab abyści tradycyjnyja mietady padklučeńnia da internetu.
Hetyja kampanii navučylisia pieratvarać pryłady, jakimi my karystajemsia štodnia, u ekvivalent nievialikich vyšak sotavaj suviazi abo partatyŭnych punktaŭ Wi-Fi, zdatnych padklučać inšyja hadžety da internetu. Pradukty ad Amazon i Apple dapamahajuć čužym hadžetam mieć dostup da sietki, pra što vy možacie i nie viedać, piša The Wall Street Journal.
Niadaŭna kampanija Amazon paviedamiła, što budzie pašyrać svaju biespravadnuju sietku Sidewalk, jakaja padłučyć usie pryłady Echo, što vyjšli paśla 2018 hoda. Sidewalk była raspracavanaja dla taho, kab dapoŭnić sietki Wi-Fi i pavysić jakaść biespravadnoj suviazi.
A jašče raniej Apple vypuściła AirTag dla pošuku zhublenych pradmietaŭ. Heta pryłada vykarystoŭvaje sietku Find My. Praź jaje AirTag i dasyłaje sihnał, jaki prymaje ajfon, ajpad ci makbuk.
Heta značyć, što ciapier možna vykarystoŭvać padłučeńnie da internetu, jakoje zabiaśpiečvajuć bieźlič pryład, što naležać inšym ludziam.
Karystalniki mohuć admovicca ad takich sistem, ale technałahičnyja hihanty robiać staŭku na toje, što ludzi hetaha rabić nie buduć dziakujučy pieravaham, jakija zabiaśpiečvajuć novyja sietki — ad pošuku zhublenych pradmietaŭ, damašnich žyvioł i navat ludziej da kantrolu nad razumnymi zamkami i sistemami biaśpieki.
Kali b my mahli bačyć, jak pracuje AirTag, to heta vyhladała b jak milisiekundnyja ŭspyški kožnyja niekalki chvilin, jakija namahajucca znajści pryłady ad Apple ŭ radyusie kala dzieviaci mietraŭ.
Hetyja społachi i zabiaśpiečvajuć pošuk zhublenych pradmietaŭ. Naprykład, kali vy padčas adpačynku ŭ čužoj krainie zhubili klučy, to mnohija nieznajomyja ajfony, jakija apynajucca pobač z klučami, buduć abmieńvacca nievialikaj kolkaściu zašyfravanych źviestak z AirTag. I navat kali vy ŭžo budziecie ŭ inšaj krainie, hetyja źviestki trapiać da vas.
Kali telefon pieradaje i atrymlivaje źviestki pa sotavaj sietcy, jon moža vykarystoŭvać da vata mahutnaści, u toj čas jak dla pieradačy pa Bluetooth patrabujecca ŭsiaho adna sotaja vata. Heta adna z hałoŭnych pieravah sietki Find My.
Sietka Sidewalk ad Amazon pracuje inakš. Sidewalk biare nievialikuju častku chatniaj sietki Wi-Fi i pieraŭtvaraje hetuju častku ŭ sihnał Bluetooth Low Energy (BLE) abo radyjosihnał. Hetyja sihnały nie takija mahutnyja, jak Wi-Fi, i nie mohuć pieradavać šmat źviestak, ale asnoŭnyja funkcyi na razumnych pryładach buduć pracavać.
BLE i radyjosihnały raspaŭsiudžvajucca dalej, čym sihnały Wi-Fi, u vyniku čaho jany mohuć złučacca ź inšymi hadžetami Amazon, što znachodziacca ŭ vašym rajonie. Kali padłučajucca niekalki hadžetaŭ, to stvarajecca sietka ź nizkaj prapusknoj zdolnaściu. Čym bolš hadžetaŭ padłučana, tym macniej stanovicca sietka Sidewalk.
Dziakujučy Sidewalk pryłady Amazon buduć pracavać pa-za miežami chatniaj sietki Wi-Fi. Bolš za toje, kali Wi-Fi adklučycca, Sidewalk usio roŭna budzie pracavać.
Na asnovie Sidewalk pracuje branzalet CareBand, dziakujučy jakomu možna adsočvać miesca znachodžańnia ludziej sa strataj pamiaci. U toj ža čas ludziam nie pryjdziecca płacić za sotavuju suviaź, kab vykarystoŭvać pryłady nakštałt CareBand.
