Fota Pixabay
Mnohija psichičnyja zachvorvańni, u tym liku depresiju, usio jašče składana dyjahnastavać. U pastanoŭcy dyjahnazu daktary ŭ asnoŭnym abapirajucca na skarhi pacyjentaŭ i acenku psichijatraŭ. Da taho ž, časta ŭźnikajuć składanaści z naznačeńniem miedykamientoznaha lačeńnia.
Vyniki novaha daśledavańnia navukoŭcaŭ ź Miedycynskaj škoły Indyjanskaha ŭniviersiteta mohuć kardynalna źmianić situacyju va ŭsim śviecie.
Daśledčyki znajšli ŭ kryvi 26 bijamarkieraŭ, z dapamohaj jakich možna vyznačyć najaŭnaść tych ci inšych parušeńniaŭ psichiki i pryznačyć adpaviednaje lačeńnie. Dla hetaha budzie dastatkova ŭziać usiaho adzin analiz kryvi.
Vyniki daśledavańnia byli apublikavanyja ŭ navukovym vydańni Molecular Psychiatry.
Spačatku navukoŭcy abrali 300 vałancioraŭ z depresijaj. Jany apisvali svoj stan, a daśledčyki brali ŭ ich analiz kryvi, kab vyznačyć suviaź pamiž nastrojem pacyjentaŭ i składam kryvi.
Dalej navukoŭcy skarystalisia bazaj źviestak z 1600 prac, pryśviečanych hienietycy, kab vyjavić šerah bijamarkieraŭ, źviazanych z afiektyŭnymi razładami. U vyniku navukoŭcam udałosia skaracić hety śpis da 26 pakazalnikaŭ, a paśla pravieryć ich dakładnaść na druhoj hrupie vałancioraŭ.
Vyjaŭlenyja bijamarkiery dapamahajuć vyjavić ciažkaść depresii ŭ pacyjenta, ryzyku raźvićcia kliničnaj depresii ŭ budučyni, a taksama imaviernaść uźniknieńnia bipalarnaha razładu.
Takim čynam navukoŭcy raspracavali dakładny instrumient dla miedycynskaj dyjahnostyki i padboru preparataŭ dla lačeńnia depresii. Da taho ž, hrupa daśledčykaŭ vyjaviła suviaź afiektyŭnych razładaŭ z hienami cyrkadnych rytmaŭ. (Hetyja hieny rehulujuć siezonnyja cykły arhanizma, a taksama cykły, źviazanyja sa źmienaj dnia i nočy.) Takim čynam źjaviłasia mahčymaść rastłumačyć, čamu simptomy niekatorych pacyjentaŭ horšajuć padčas źmieny pary hoda i čamu ŭ ich uźnikajuć parušeńni snu.
