U novaj pastanovie Saŭmina jość dadatkovaja hłava №17, dzie paznačana, što kožny miesiac treba apłačvać pasłuhi pa kiravańni ahulnaj majomaściu sumiesnaha domaŭładańnia. Pad ahulnaj majomaściu majecca na ŭvazie ŭsio, što za miežami kvatery ŭ šmatpaviarchoviku. Ad padjezda i padvała da dvarovaj terytoryi. Jość źmieny i ŭ častcy apłaty elektryčnaści.
Žycharoŭ abaviažuć apłačvać elektryčnaść, jakoj aśviatlajucca dapamožnyja pamiaškańni i jakaja zatračvajecca na pracu abstalavańnia.
Jak raspaviali ahienctvu «Minsk-Naviny» ŭ Minskaj haradskoj žyllovaj haspadarcy, hrošy z adličeńniaŭ na kapramont, apłaty «kamunałki» iduć pieravažna na sami pracy, ale jość inšyja «arhanizacyjnyja mierapryjemstvy», a jašče biełarusy nie płaciać za ŭtrymańnie prydamavych terytoryj.
«Heta vialiki płast pracy nie tolki pa ŭborcy, ale taksama pa azielanieńni, jamačnym ramoncie prajezdaŭ, uładkavańni kantejniernych placovak i asobnych kantejnieraŭ dla paasobnaha zboru adchodaŭ. Siudy ž možna dadać viasnovyja i vosieńskija ahlady žyłych damoŭ i mnohaje inšaje, što schavana ad vačej žycharoŭ, ale patrabuje času, namahańniaŭ, resursaŭ dla zabieśpiačeńnia naležnaj ekspłuatacyi žyłfondu», — raspaviali ŭ MHŽH.
Suma budzie roznaj, jana zaležyć ad płoščy kvatery. Taryf — 0,0165 rubla za 1 kv.m.
Pastanova ŭstupiła ŭ siłu 1 maja 2021 hoda. Čakajecca, što novy radok u «žyroŭkach» źjavicca ŭ druhim paŭhodździ. Praŭda, jak kažuć čynoŭniki, z ulikam źjaŭleńnia hetaj pasłuhi pavinien źmienšycca košt inšych — płaty za techabsłuhoŭvańnie doma, lifta, vyvaz śmiećcia, pryborka padjezdaŭ.
