Uviečary 7 krasavika da Juli ŭ Pryłuckuju Słabadu, dzie jana žyvie, pryjechali supracoŭniki milicyi. Razam ź joj u toj ža dzień zatrymali maci i brata — ich asudzili za niepadparadkavańnie na 5 i 6 sutak adpaviedna.
Siastru Liliju taksama zabirali ŭ RUUS na try hadziny, ale paśla adpuścili, bo ŭ jaje jość niepaŭnaletnija dzieci.
Za špacyr ź biełym parasonam sudździa Viktoryja Šabunia prysudziła dziaŭčynie 25 sutak. Fota Tut.by
Usie 25 sutak Julija Michajłava praviała na Akreścina. Ad tych, chto raniej vychodziŭ na volu ź jaje kamiery, siastra Julii Lila zahadzia viedała pra žudasnyja ŭmovy ŭ CIP. Kamiera była pierapoŭnienaja (zdarałasia, što ŭ dvuchmiascovaj kamiery znachodziłasia adrazu 10 čałaviek), akno nie adkryvałasia, brakavała kisłarodu. Listy da asudžanych nie dachodzili, knihi i inšyja rečy dla baŭleńnia času adbiralisia.
Źniavolenych mahli budzić niekalki razoŭ za noč, patrabujučy nazvać svajo imia i proźvišča. Na padłohu amal kožnuju ranicu vylivali vadu z chłorkaj. U peŭny momant da dziaŭčat padsialili biazdomnuju z vošami. Usio heta paćvierdziła nam sama Jula:
— Nakolki my zrazumieli, z nami była taja ž biazdomnaja, jakuju padsialali ŭ kamieru da Volhi Chižynkovaj. Pry hetym mycca nas nie vadzili: padmyvalisia z butelek, jakija ŭ nas taksama ŭvieś čas imknulisia zabrać supracoŭniki izalatara. A na špacyr za 25 sutak ja trapiła ŭsiaho adzin raz: na 24-ja sutki.
Razam ź Julaj u kamiery apynułasia, naprykład, maci Siarhieja «chłopotnoje dielcie» Mironava. Dziaŭčyna kaža, što jana trymajecca małajcom.
Siarod inšych ździekaŭ, jakija pieraličvaje Jula, — toje, što pieradačy addavali ź vialikaj zatrymkaj, amal u paru tydniaŭ. Miascovaja ž ježa časam była zusim žachlivaj: naprykład, u jakaści supu davali pustuju hrečku z vadoj.
— Kab nam stali davać narmalnuju ježu, my navat pačali haładoŭku, — kaža surazmoŭca.
Na ŭsie padobnyja ŭmovy dziaŭčaty sprabavali skardzicca, prasili papieru i asadki, kab aformić skarhu aficyjna, ale im admaŭlali. Zaniacca hetym płanujuć užo na svabodzie.
Pa subotach i niadzielach na Akreścina davali pa jajku. Adno ź ich Jula na Vialikdzień raśpisała zubnoj pastaj i zmahła pranieści na volu. Heta sapraŭdnaja ŭdača, bo zvyčajna na vychadzie zabirajuć usio: ad padziełak z chleba da zapisak ad asudžanych rodnym.
Raniej Julija Michajłava ŭžo čatyry razy adbyvała administracyjny aryšt. Upieršyniu jaje zatrymali 14 vieraśnia 2020 hoda na žanočaj akcyi kala Čyrvonaha kaścioła — sud prysudziŭ 12 sutak. Paśla jana pabyła na voli litaralna paru dzion i znoŭ była asudžanaja na 15 sutak za špacyr z kvietkami ŭ rukach. Treciaja adsidka zdaryłasia ŭ listapadzie paśla naviedvańnia Płoščy Pieramien, kudy biełarusy pryjšli ŭšanavać pamiać zabitaha Ramana Bandarenki, a čaćviortaja — zimoj. 31 studzienia dziaŭčyna išła pa centralnym praśpiekcie z łampadkaj u rukach i tak «zdabyła» sabie jašče 15 sutak u skarbonku.
Častkova pra svajo žyćcio ŭ izalatarach Jula raskazała ŭ filmie «Siostry pratestu».
U sumie, pačynajučy ź vieraśnia-2020, dziaŭčyna praviała za kratami 82 dni.
«25 sutak u paraŭnańni z 15-ciu ciahnulisia, zdajecca, viečnaść», — kaža Jula. Pry hetym dziaŭčyna nastrojena vielmi pazityŭna: čarhovaje źniavoleńnie jaje dakładna nie złamała.
