Prezident Litvy Hitanas Naŭsieda. Fota Nadziei Bužan.
Učyniŭ nad saboj akt maralnaha hvałtu i pahladzieŭ na BT-1 prahramu «Poniatnaja politika», dzie viadučy i «ekśpierty» z surjoznym vyhladam razvažali pra los niaščasnych krain Bałtyi. Maŭlaŭ, svaju pramysłovaść razvalili, savieckija zavody pazakryvali, i adzinaje, što hetyja krainy mohuć ekspartavać ciapier, heta rusafobija.
Mnie stała cikava, ja pahladzieŭ, što i ŭ jakich abjomach ekspartuje biednaja i niaščasnaja Litva, jakaja, niebaraka, nibyta zastałasia biez svajoj pramysłovaści. Havorka idzie tolki pra ekspart tavaraŭ (u tym liku pramysłovych), ekspart pasłuh nie ŭličvajem.
Ličby vas šakujuć.
Litva (z nasielnictvam 2,8 młn) maje abjom ekspartu tavaraŭ taki ž samy, jak i 9,4-miljonnaja Biełaruś — kala 32 miljardaŭ USD. Danyja pa Biełarusi pryviedzieny za 2019 hod (u 2020 hodzie ekspart byŭ jašče mienšy), danyja pa Litvie — za kryzisny 2020 hod.
Pryčym u vypadku Biełarusi tracina hetaha ekspartu — pradukty pierapracoŭki z tannaj rasijskaj nafty i syravina.
A voś što ekspartuje «biednaja» Litva (u dužkach, dla paraŭnańnia, anałahičny ekspart ź Biełarusi).
Miechaničnaha abstalavańnia i katłoŭ — 2,86 młrd USD (Biełaruś ekspartavała na 1,45 młrd USD).
Elektryčnych mašyn i abstalavańnia — 2,15 młrd USD (Biełaruś — na 1,07 młrd USD).
Biez usialakich «madernizacyj pad kantrolem prezidenta» Litva ekspartavała mebli, paścielnych rečaŭ i śvietłavoha abstalavańnia na 2,64 młrd USD.
Dy što tam mebla, maleńkaja Litva navat umudryłasia ŭ 2020 hodzie ekspartavać zbožža na 1,12 młrd USD.
Davajcie paraŭnajem i vałavy ŭnutrany pradukt. U «biednaj» Litvie jon składaje 22 245 USD na dušu nasielnictva, a ŭ «mocnaj i kvitniejučaj» Biełarusi — 6 487 USD.
Adpaviednyja i zarobki najmanych rabotnikaŭ. U Biełarusi siaredni zarobak ad 2010 hoda vahajecca ŭ rajonie 400—450 dalaraŭ čystymi. U Litvie jon u 2020 hodzie dasiahnuŭ 1850 dalaraŭ brudnymi i 1150 dalaraŭ čystymi (u Litvie vysoki ŭzrovień sacyjalnaj abaronienaści i tamu — vysokija padatki: zatoje biaspłatnaja miedycyna i adukacyja, vysokija dapamohi pa biespracoŭi i subsidyi biednym).
Kali Litva takaja biednaja i žabrackaja, to jakim słovam možna apisać ekanamičny stan Biełarusi?
