U sudzie praciahvajecca dopyt śviedak, jakich dastaŭlajuć ź SIZA KDB. Za kafiedraj śviedki stajać u kajdankach, złučanych mietaličnym łancuhom z kanvairam, raspaviadajuć Tut.by vidavočcy.
U paniadziełak dapytvali Antona Marozava, dyrektara TAA «Cistemy apracoŭki infarmacyi». Ź jaho słoŭ, z rachunku tavarystva na rachunak adnaho ź jaho zasnavalnikaŭ — Bałtyjskaj inviestycyjnaj hrupy — pieraličvalisia dyvidendy ad prybytku firmy, što jon nazvaŭ «niezakonnaj hrašovaj uznaharodaj» supracoŭnikam banka. Taksama skazaŭ, što ad 2017 da 2020 pieradavaŭ Kiryłu Badzieju (namieśnik staršyni praŭleńnia banka, jaki kuryruje kirunak roźničnaha biznesu) najaŭnyja hrašovyja srodki — z doli dyvidendaŭ zamiežnaha ŭdzielnika.
Siońnia dapytvali Uładzimira Drazda — pamočnika Dźmitryja Kuźmiča (jaki da zatrymańnia zajmaŭ pasadu namieśnika staršyni praŭleńnia Biełhazprambanka), jaki skazaŭ, što pa daručeńni Kuźmiča analizavaŭ ruch pa rachunku estonskaj kampanii «Kampartniers», jakaja vałodała dolaj u TAA «Aktyŭlizinh» i atrymlivała ŭ suviazi z hetym dyvidendy.
Dźmitryj Žardziecki raspavioŭ, što prykładna ŭ 2008-2009 hodzie Valeryj Sialaŭka (siabra Rady dyrektaraŭ Biełhazprambanka, pamior u 2011 hodzie) paprasiŭ jaho być pradstaŭnikom zamiežnaj kampanii, jakaja zajmałasia inviestycyjnaj dziejnaściu ŭ Biełarusi. Dakumienty dla padpisańnia ad imia hetaj kampanii Žardzieckamu pieradavaŭ juryst banka Šaŭčuk.
Andrej Hryharovič (były dyrektar departamienta roźničnaha biznesu Biełhazprambanka) rastłumačyŭ, što rašeńni, jakija tyčacca TAA «Pryvatlizinh» prymalisia ŭ zvyčajnym paradku. U tym liku byvali vypadki, kali na kredytnym kamitecie rašeńni prymalisia nie na karyść tavarystva.
Usie hetyja śviedki znachodziacca ŭ SIZA KDB z červienia 2020.
Sprava Babaryki i top-mieniedžaraŭ Biełhazprambanka
Praces pa «spravie Biełhazprambanka» Viktara Babaryki, jaki moh stać hałoŭnym supiernikam Alaksandra Łukašenki na prezidenckich vybarach u žniŭni minułaha hoda, pačaŭsia 17 lutaha. Spravu razhladaje Viarchoŭny sud u budynku suda Maskoŭskaha rajona.
Užo na niekalki pasiadžeńniaŭ pres-słužba Viarchoŭnaha suda admoviłasia akredytavać žurnalistaŭ najbujniejšych niezaležnych miedyja.
Pa «spravie Biełhazprambanka» prachodziać vosiem fihurantaŭ. Viktar Babaryka abvinavačvajecca ŭ «admyvańni» srodkaŭ, atrymanych złačynnym šlacham (art. 235 č. 2 KK, da siami hadoŭ pazbaŭleńnia voli), i atrymańni chabaru ŭ asabliva bujnym pamiery (art. 430 č. 3 KK, da 15 hadoŭ pazbaŭleńnia voli). Alaksiej Zadojka (były pieršy namieśnik staršyni praŭleńnia Biełhazprambanka), Kirył Badziej (v. a. staršyni praŭleńnia Biełhazprambanka paśla sychodu Babaryki), Siarhiej Šaban (namieśnik staršyni praŭleńnia Biełhazprambanka), Dźmitryj Kuźmič (namieśnik staršyni praŭleńnia banka), Alaksandr Iljasiuk (namieśnik staršyni praŭleńnia banka), Siarhiej Dabralot (były namieśnik staršyni praŭleńnia banka) abvinavačvajucca ŭ atrymańni chabaru ŭ asabliva bujnym pamiery. Viktar Kabiak (zasnavalnik kampanii «Aktyŭlizinh») abvinavačvajecca ŭ dačy chabaru paŭtorna albo ŭ bujnym pamiery.
Viktar Babaryka — adziny z vaśmi fihurantaŭ nie pryznaŭ vinu. Babaryka zajaviŭ, što i jon, i astatnija fihuranty spravy nievinavatyja, a sprava — palityčna matyvavanaja.
