Na dumku Alaksieja i redakcyi Hrodna.life, rašeńnie treba admianić u suviazi z adnabakovaściu, niepaŭnatoj i nieabjektyŭnym daśledavańniem abstavinaŭ. Spravu varta spynić za adsutnaściu składu administracyjnaha pravaparušeńnia, ličyć hałoŭny redaktar. Kali projdzie pasiadžeńnie ŭ abłasnym sudzie, pakul nieviadoma.
Čamu spravu varta spynić?
U sudzie 19 sakavika Alaksiej Šota pryznaŭ, što sapraŭdy raźmiaściŭ spasyłku i łahatyp Telegram-kanała ŭ materyjałach na sajcie. Ale, pa-pieršaje, na toj momant Telegram-kanał nie byŭ pryznany ekstremisckim. Pa-druhoje, paśla pryznańnia jaho ekstremisckim na sajcie vydalili ŭsie zhadki, jakija zmahli znajści. A značyć, śviadomaha, metanakiravanaha i naŭmysnaha raspaŭsiudžvańnia ekstremisckich materyjałaŭ, što staviłasia ŭ vinu Alaksieju, nie było.
Prysudzili štraf, kanfiskavali techniku
19 sakavika ŭ sudzie Leninskaha rajona Hrodna hałoŭnamu redaktaru Hrodna.life Alaksieju Šocie prysudzili štraf u 400 bazavych vieličyń (11 600 rubloŭ) — jak pradstaŭniku arhanizacyi — i 25 bazavych vieličyń (725 rubloŭ) — jak fizičnaj asobie — pa art. 17.11 KaAP (u redakcyi 2003 hoda). Kanfiskavanuju ŭ redakcyi techniku adpravili na ekśpiertyzu i pa hetym fakcie pačali asobnuju pravierku.
Spravu razhladała sudździa Natalla Kozieł. Śviedkam pa spravie prachodziŭ supracoŭnik milicyi Vadzim Nalivajka, taksama ŭdzielničaŭ pradstaŭnik AUS Andrej Pihulski.
Spravy za raspaŭsiudžvańnie ekstremisckich materyjałaŭ
12 krasavika pa tym ža artykule pačnuć sudzić redaktara newgrodno.by Ihara Bublikava (Remzika). Taksama pravodziać pravierku ŭ dačynieńni da «Haziety Słonimskaj».
