U Astraŭcy razhladali administracyjnuju spravu pa fakcie pikietavańnia ŭ budynku smarhonskaha suda. Astraviecki sud pryznaŭ smarhoncaŭ vinavatymi i pryznačyŭ sutki i štrafy, piša «Rehijanalnaja hazieta».
«Rehijanalnaja hazieta» pahutaryła ź Jaŭhienam Novikavym, jaki raskazaŭ pra pieršyja dva pasiadžeńni ŭ sudzie Astravieckaha rajona. Usiaho pa spravie prajšli try pasiadžeńni.
Novikaŭ raskazaŭ, što pa spravie prachodzili šaściora čałaviek, u tym liku i jon sam. Padtrymać smarhoncaŭ u sudzie pryjechała kala 10 čałaviek. Pieršaje pasiadžeńnie adbyłosia 31 sakavika. Tych, chto pryjechaŭ padtrymać, u sud nie puścili.
— Kala suda chadzili patruli. Čaćviora stajali na punkcie achovy — poŭny ahlad mietaładetektaram. La zały stajali ludzi ŭ cyvilnym. My ŭnutr zachodzim — siadziać małojčyki. Usie na adzin tvar.
Śviedka Piatrova, jakaja pačuła voklič «Žyvie Biełaruś!», adsutničała na pasiadžeńni. Jana dasłała ŭ sud aficyjnuju zajavu, što syšła ŭ adpačynak i znachodzicca za miežami Hrodzienskaj vobłaści. Piatrova prasiła razhladać spravu ŭ jaje adsutnaść, spasyłacca na jaje papiarednija pakazańni.
— Jana napisała aficyjnuju zajavu, što jaje nie budzie padčas pasiadžeńniaŭ. U hetaj zajavie Piatrova napisała nastupnaje: «Ad staršyni suda Smarhonskaha rajona staršyni suda Astravieckaha rajona». Značyć, u aficyjnym dakumiencie jana źviartajecca nie jak śviedka, udzielnik pracesu, a jak sud da suda. Heta dziŭna.
Novikaŭ ličyć, što ŭ pakazańniach Piatrovaj jość razychodžańni, a inšyja śviedki abapirajucca tolki na ich — supracoŭniki milicyi, što zatrymlivali i składali raparty, achoŭnik, jaki vyklikaŭ narad. Pa słovach Novikava, adzinym dokazam, što voklič sapraŭdy byŭ, — heta aŭdyjazapis z pasiadžeńnia Piatrovaj. Adnak u im nie čuvać, chto dakładna kryknuŭ «Žyvie Biełaruś».
— U administracyjnaj spravie dva tamy. Navat nie vielmi važna, što my atrymajem, kali nas pryznajuć vinavatymi: siadziem na sutki ci budziem płacić štrafy. Na nas ža ŭzbudzili kryminalnuju spravu — asabliva złosnaje chulihanstva ŭ składzie hrupy asob. Pa joj niama padazravanych.
Novikaŭ upeŭnieny, što ŭ vypadku, kali ludziej pryznajuć vinavatymi ŭ administracyjnym pravaparušeńni, to ŭ kryminalnaj spravie aŭtamatyčna i źjaviacca padazravanyja.
— Heta i jość meta administracyjnaj spravy, razumiejecie? 18 krasavika vychodziać terminy, ale nichto nie budzie čakać i spravu nie zakryjuć.
8 krasavika prajšło apošniaje pasiadžeńnie pa spravie. Troch čałaviek — Jaŭhiena Novikava, Siarhieja Traja i Ludmiłu Sulžyckuju — pakarali administracyjnym aryštam. Adnak jany adrazu nie pajechali jaho adbyvać. Jany dahetul znachodziacca na voli i ličać, što ich adpuścili, kab paśla zabrać u luby momant. Astatnija atrymali štrafy u 20 i 30 bazavych vieličyń.
«Žyvie Biełaruś» u sudzie i masavyja zatrymańni
18 lutaha ŭ Smarhoni ahučyli prysud Iniesie Markavaj i Rusłanu Valuku pa kryminalnaj spravie za paklop u dačynieńni da milicyjanieraŭ. Paśla abviaščeńnia ŭ kalidory suda niechta z tych, chto padtrymlivaŭ Markavu i Valuka, kryknuŭ «Žyvie Biełaruś!». Voklič pačuła staršynia smarhonskaha suda Ludmiła Piatrova, jakaja znachodziłasia ŭ susiedniaj zale. Pa jaje prośbie vyklikali narad milicyi, jaki paśla zatrymaŭ niekalki smarhoncaŭ.
Paśla incydentu ŭ sudzie ŭ Smarhoni pačali masava zatrymlivać ludziej, jakija prysutničali na pracesie Markavaj i Valuka. Sutki adsiedzieli Ludmiła Sulžyckaja, Jaŭhien Novikaŭ, Siarhiej Traj, Illa Pietunoŭ, Ramuald Ułan, Jaŭhien Mackievič. Paśla troch sutak u izalatary ich adpuścili na volu, a smarhonski sud nakiravaŭ spravy na dapracoŭku.
Za hety čas ź Biełarusi departavali Illu Pietunova — jon hramadzianin Rasii. Ramuald Ułan znachodzicca na «chimii» ŭ Homieli — adbyvaje pakarańnie pa kryminalnaj spravie za raspaŭsiudžvańnie łžyvych źviestak u dačynieńni da smarhonskich milicyjanieraŭ.
