spring96.org
Sudździa — Dźmitryj Kiedal. Prakuror — Uljanava. U pracesie ŭdzielničaŭ taksama paciarpieły padpałkoŭnik milicyi Vadzim Palakoŭ.
Pavodle śledstva, 30 kastryčnika 2020 hoda Darja Dvajnych pad fotazdymkam Palakova ŭ adnym z telehram-kanałaŭ raźmiaściła kamientar abraźlivaha źmiestu. Try słovy z hetaha kamientara byli pryznanyja ŭ materyjałach spravy abraźlivymi.
Na sudzie Darja Dvajnych pryznała svaju vinu častkova. Pryznajučy źnievažalny charaktar napisanaj joj frazy, jana razam z tym śćviardžała, što jana nie viedała spačatku, što na fotazdymku słužbovaja asoba. Na fota Vadzim Palakoŭ byŭ u cyvilnym adzieńni. Situacyja datyčyłasia tych dzion, kali milicyja papiaredžvała i zatrymlivała rabotnikaŭ pradpryjemstva «Azot». Dvajnych skazała, što padumała, što heta adzin z pradstaŭnikoŭ administracyi zavodu, naprykład, načalnik cechu.
Vadzim Palakoŭ zajaviŭ u sudzie, što hety kamientar u telehram-kanale jamu pakazali jaho padnačalenyja, paźniej kamientar bačyli taksama jaho dzieci, što pryniesła padpałkoŭniku maralnyja pakuty.
Dadatkovych prablem sa zdaroŭjem pry tym nie ŭźnikła. Palakoŭ napisaŭ adpaviednuju zajavu ŭ śledčyja orhany pa fakcie hetaha kamientara i na inšyja abraźlivyja kamientary inšych ludziej. Śledčyja orhany vyjavili aŭtarstva kamientara tolki Darji Dvajnych. Pry tym u jaje ŭ kvatery prajšoŭ pieratrus, jaki ažyćciaŭlali ahułam ažno 9 čałaviek (5 ź ich byli ŭ formie AMAPa). Darja Dvajnych i jaje blizkija pieražyli tady sapraŭdny šok. Paźniej śledčyja zajavilisia ŭ kvateru paŭtorna i chacieli navat uziać Dvajnych pad vartu.
Darja Dvajnych vychoŭvaje dvaich niepaŭnaletnich dziaciej i znachodzicca zaraz u adpačynku pa dohladzie małodšaha dziciaci. Na sudzie Dvajnych vykazała prabačeńni Palakovu. Prabačeńni byli pryniatyja, choć Palakoŭ i vykazaŭ sumnievy ŭ ščyraści raskajańnia i prabačeńnia žančyny.
Paralelna padpałkoŭnik Palakoŭ zajaviŭ pazoŭ na kampiensacyju maralnych pakut — była ahučana suma 500 rubloŭ. Jon abiacaŭ pieravieści hetyja hrošy ŭ adnu ź dziciačych ustanoŭ. Dvajnych pryznała hety isk, ale paprasiła sud źnizić sumu kampiensacyi da 300 rubloŭ.
Potym abvinavaŭca Uljanava vykazała mierkavańnie, što vina Darji Dvajnych całkam dakazanaja i prapanavała sudu z ulikam źmiakčalnych abstavin pakarać žančynu 1 hodam i 6 miesiacami abmiežavańnia voli biez nakiravańnia va ŭstanovu adkrytaha typu («chatniaja chimija»).
Palakoŭ pahadziŭsia z bokam abvinavačańnia, ale prapanavaŭ nie karać Dvajnych žorstka.
U vyniku Dźmitryj Kiedal ahučyŭ prysud: 1 hod abmiežavańnia voli biez nakiravańnia va ŭstanovu adkrytaha typu (chatniaja chimija) i 500 rubloŭ maralnaj kampiensacyi paciarpiełamu, akramia hetaha Dvajnych musić zapłacić 87 rubloŭ dziaržaŭnaj pošliny.
