Skrynšot videa «Radyjo Svaboda»
Mieru strymańnia źmianili z zaklučeńnia pad vartu na padpisku ab niavyjeździe i naležnych pavodzinach. Alaksandru Patrasajevu vyzvalili ŭ zale suda.
Alaksandru vinavacili ŭ tym, što jana pryniała ŭdzieł u masavych biesparadkach kala HC «Ryha» ŭ noč z 10 na 11 žniŭnia 2020 hoda: z hrupaj asobaŭ pa papiaredniaj zmovie błakavali ruch transpartu, uzvodzili barykady, źniščali tratuarnuju plitku, vykarystoŭvali pietardy, fakieły i inšyja pradmiety.
Čytajcie taksama: Pačaŭsia sud nad Alaksandraj Patrasajevaj, što akazvała dapamohu paciarpiełym na Surhanava i Biady
Dziaŭčyna vinu nie pryznała, sudu raspaviała, što akazvała miedycynskuju dapamohu ludziam na vulicach Biady, Bahdanoviča, Surhanava. Na miescy nie bačyła supracoŭnikaŭ milicyi, patrabavańniaŭ ab spynieńni niezakonnaha mierapryjemstva nie čuła. Bačyła, što tam było kala 50 čałaviek, jakija ŭzvodzili barykady, ale nie bačyła padpałaŭ, pahromaŭ, kab ludzi kidali roznyja pradmiety.
Alaksandru zatrymali ŭ tuju ž noč, troje sutak jana ŭtrymlivałasia ŭ CIP na Akreścina, dzie, pa jaje słovach, jaje katavali: źbivali, abražali i pahražali zhvatavańniem.
Učora Alaksandra vystupiła z apošnim słovam u sudzie Maskoŭskaha rajona.
«Ja chaču vykazać słovy ščyraj padziaki tym, chto mianie lubić i čakaje. Vy mienavita tyja ludzi, jakija dali mnie zrazumieć, što adzinota heta nie pra mianie. Vy mienavita tyja ludzi, jakija padzialili sa mnoj usie ciažkaści i pakazali mnie, što ja mocny čałaviek. Vy nadavali mnie sił, upeŭnienaści, a samaje hałoŭnaje, usialali ŭ mianie nadzieju. Ja dzialu z vami kožnuju chvilinu, kožny dzień, praviedzieny ŭ ścienach SIZA. Ale taksama ja chaču pryznacca vam sumlenna ŭ tym, što pierada mnoj byŭ vybar — škadavać siabie ci vycierci ślozy i zmahacca za siabie i tych, chto byŭ sa mnoj uvieś hety čas. Ja viedaju, što mianie lubiać i čakajuć, a ja lublu vas. Dziakuj!» — skazała jana.
