Kiraŭnik chunty hienierał Min Aŭn Chłajn uručaje ŭznaharodu namieśniku ministra abarony Rasii. Skrynšot z Irrawady.com
Rasija adkryta padtrymlivaje chuntu pad kiraŭnictvam hienierała Min Aŭn Chłajna. Padčas vajskovaha parada ŭ Mjanmie, jaki bolšaść krain bajkatavali, namieśnik ministra abarony Rasii Alaksandr Famin adznačyŭ, što Rasija namahajecca ŭzmacnić vajennyja suviazi z Mjanmaj, bo ličyć jaje «nadziejnym sajuźnikam i stratehičnym partnioram u Azii», piša birmanski sajt Irrawady.com.
Rasija źjaŭlajecca adnym z najbujniejšych pastaŭščykoŭ zbroi ŭ Mjanmu. Za pieryjad z 2010 da 2019 hoda adna z najbiadniejšych krain śvietu Mjanma vydatkavała $807 miljonaŭ na ŭzbrajeńnie rasijskaj vytvorčaści. A za dva tydni da vajennaha pieravarotu Siarhiej Šajhu, ministr abarony Rasii, padpisaŭ kantrakt z Mjanmaj na pastaŭki sistem supraćpavietranaj abarony, bieśpiłotnikaŭ i radyjołakacyjnaha abstalavańnia.
Rasija i Kitaj zabłakavali rezalucyju z krytykaj chunty Mjanmy ŭ Radzie Biaśpieki AAN. Heta nie pieršy taki vypadak. Abiedźvie krainy nieadnarazova błakavali rezalucyi Rady pa Mjanmie na praciahu troch dziesiacihodździaŭ.
Ekśpierty adznačajuć, što kali Piekin hetym razam zaniaŭ bolš strymanuju pazicyju, nie padtrymlivaje chuntu adkryta, a Deli aściarožničaje, bajučysia šturchnuć armiju Mjanmy ŭ abdymki svajho stratehičnaha kankurenta — Kitaja, to Maskva dziejničaje adkryta. Jana bačyć u birmanskaj dyktatury patencyjny płacdarm u Paŭdniova-Uschodniaj Azii. Heta typovaja dla Rasii taktyka apošnim časam. U Jeŭropie Rasija tracić ahromnyja srodki na padtrymku režymu Alaksandra Łukašenki. U Siryi rasijski ekśpiedycyjny korpus uratavaŭ dyktatarski režym Bašara Asada. A ŭ Łacinskaj Amierycy Rasija kredytuje zbankrutavanuju dyktaturu ŭ Vieniesuele.
