Kansultant «Radyjo Svaboda», palitviazień Ihar Łosik za kratami z 25 červienia 2020 hodu — 281 dzień. Tydzień tamu jon pačaŭ znajomicca z materyjałami abvinavačvańnia. Žonka Ihara Darja Łosik raskazała «Svabodzie» pra apošnija naviny ad muža.
«Učora Ihar atrymaŭ dziesiać listoŭ, ale maje jamu pa-raniejšamu nie dachodziać, — kaža Darja. — Apošni byŭ na pačatku sakavika, 8 čysła. Ja ad jaho taksama nie atrymała. Ciapier Ihar praciahvaje znajomicca z materyjałami spravy, razam z advakatam. Jak šmat jany ŭžo vyvučyli, nie mahu skazać, nia viedaju hetaha. Na zdaroŭje Ihar nia skardzicca. Pieradačy jamu prymajuć biez pytańniaŭ. Ja pieradała i pradukty, i abutak viasnovy taksama».
Novaje, treciaje abvinavačańnie Iharu Łosiku vystavili 11 sakavika. Na znak pratestu Ihar paškodziŭ sabie zapiaście na vačach u advakata i śledčaha, a taksama abviaściŭ suchuju haładoŭku. Za heta Łosika źmiaścili ŭ karcer śledčaj turmy Žodzina. Tam jon prabyŭ piać dzion, čatyry ź jakich trymaŭ suchuju haładoŭku.
Pa jakim artykule Łosiku vystavili novyja abvinavačańni, nieviadoma. Jahony advakat Dźmitryj Lepretar pad padpiskaj ab nierazhałošvańni.
Ihara Łosika zatrymali 25 červienia 2020 hodu ŭ jaho domie ŭ Baranavičach. U toj ža dzień stała viadoma, što ŭ dačynieńni da Łosika zaviali kryminalnuju spravu pa artykule 342 — «Arhanizacyja i padrychtoŭka dziejańniaŭ, jakija hruba parušajuć hramadzki paradak». 15 śniežnia Iharu Łosiku vystavili novaje abvinavačańnie pa 293 artykule KK — «Padrychtoŭka da ŭdziełu ŭ masavych biesparadkach». Na znak pratestu Ihar Łosik abviaściŭ biesterminovuju haładoŭku, admaŭlaŭsia ad ježy 42 dni.
