Fota Nadziei Bužan
Statkievič ad 31 maja, bolš za dziesiać miesiacaŭ, znachodzicca ŭ turmie, ciapier jon u turmie №8 u Žodzinie. 11 sakavika stała viadoma, što SK zaviaršyŭ rasśledavańnie spravy «Siarhieja Cichanoŭskaha, Mikałaja Statkieviča i nabližanych da ich asobaŭ», adnak, jakija kankretna abvinavačańni vystaŭlenyja Statkieviču, nie paviedamlałasia.
Žonka palityka Maryna Adamovič miarkuje, što jamu pierakvalifikavali abvinavačańnie — ciapier Statkieviču inkryminujuć parušeńnie častki 1 artykuła 293 KK(«Arhanizacyja masavych biesparadkaŭ»), choć raniej jon prachodziŭ pa druhoj častcy hetaha ž artykuła («Udzieł u masavych biesparadkach»).
U pieradadzienych adkazach Mikałaj Statkievič padzialiŭsia z DW svaim staŭleńniem da jahonaj kryminalnaj spravy, raspavioŭ pra cisk na jaho ŭ turmie i daŭ acenku padziejam, jakija adbyvajucca ŭ Biełarusi.
Abvinavačvańni, jakija ŭłady vystavili Mikałaju Statkieviču, sam jon łakanična nazyvaje «tryźnieńniem». Na pytańnie ab samaadčuvańni ŭ turmie apazicyjanier adkazaŭ, što «dyktatar nie dačakajecca», adnak paviedamiŭ pra sproby cisku:
«U červieni 2020 hoda, jašče padčas administracyjnaha aryštu, vykarystoŭvalisia takija mietady: pazbaŭlali snu, pa 5-7 razoŭ za noč zabiahajučy ŭ kamieru i stukajučy dubinkami pa mietale; nie vadzili ŭ duš, pazbaŭlali pieradačy, prahułak, čytańnia. Byli i siłavyja sutyknieńni».
Ciapier, pa słovach Statkieviča, suprać jaho ŭ turmie ŭ asnoŭnym vykarystoŭvajuć hučny huk. «Z repraduktara kruciać zapisy intervju Łukašenki, pakajańniaŭ źniavolenych, słužbovyja instrukcyi. Siła huku takaja, što navat televizar na maksimalnaj hučnaści nie čuvać. Takoje adbyvajecca tolki ŭ majoj kamiery. Časam kruciać usiu noč, pamianšajučy hučnaść, kab nie pieraškadžać asudžanym u inšych kamierach», — raspavioŭ apazicyjanier. I dadaŭ, što zmoh adaptavacca da takich umoŭ, vyrabiŭšy sabie bierušy z hubki dla myćcia posudu.
Sioniašniaja situacyja ŭ Biełarusi, na dumku Statkieviča, istotna adroźnivajecca ad padziej 2010 hoda. «Ciapier biełaruski narod viedaje pra toje, što jon za pieramieny, za źmienu ŭłady, ludzi chočuć svabody. Biełarusy pierakanalisia ŭ tym, što ź siabie ŭjaŭlaje ŭłada. Nie dumaju, što nielehitymny ŭ našych i suśvietnaj supolnaści vačach dy ekanamična nie samadastatkovy režym zmoža zachavać kantrol na praciahu doŭhaha času», — adznačyŭ Statkievič u intervju DW.
Śviatłanu Cichanoŭskuju jon nazyvaje «abranym prezidentam, jakomu nie dali zaniać svajo miesca», adnak aceńvać biahučyja dziejańni demakratyčnych sił, znachodziačysia ŭ turmie, apazicyjanieru ciažka. «Na realny dyjałoh (z apazicyjaj) Alaksandr Łukašenka pojdzie tolki tady, kali jaho budzie pozna ratavać ad naroda», — ličyć Statkievič. Na jahonuju dumku, biełarusy dahetul nie pieramahli Łukašenku tolki tamu, što ŭ taho jość padtrymka Kramla.
Havoračy ab raźvićci palityčnaha kryzisu ŭ Biełarusi, Statkievič prahnazuje ŭzmacnieńnie cisku na hramadstva, pavolnuju dehradacyju ekanomiki i niepaźbiežnyja pieramieny: «Ale ŭ cełym naš narod čakaje vydatnaja budučynia, bo my jaje zasłužyli». Biełarusam, jakija praciahvajuć baraćbu, Mikałaj Statkievič pažadaŭ «hodnaści i voli».
