24-hadovaha Jahora Staravojtava sudziać za parušeńnie artykuła 19.11 KaAP (Raspaŭsiudžvańnie, vyrab, zachoŭvańnie, pieravozka infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść).
Knihu Źmitra Łukašuka «Biełaruskaja nacyjanalnaja ideja» chłopiec kupiŭ u «Akademknizie» ŭ kancy śniežnia 2020-ha. Pa sutnaści, heta zbornik interviju, jakija hučali ŭ efiry «Jeŭraradyjo».
11 lutaha da Jahora pryjšła milicyja, kanfiskavała knihu, a tolki 4 sakavika śpiecyjalnaja kamisija znajšła ŭ joj «prykmiety prajavy ekstremizmu». Jahor ab hetym fakcie daviedaŭsia 31 sakavika, kali ŭ RAUS Minskaha rajona jamu ŭručyli pozvu ŭ sud. Chłopiec pracuje inžynieram-prahramistam, raniej da administracyjnaj adkaznaści nie pryciahvaŭsia.
Varta adznačyć, što ŭ Respublikanskim śpisie ekstremisckich materyjałaŭ knihi «Biełaruskaja nacyjanalnaja ideja» pa stanie na 1 krasavika (dzień pasiadžeńnia) niama.
Spravu ŭ sudzie Minskaha rajona razhladaŭ sudździa Viktar Šaŭcoŭ. Jon ahučyŭ pratakoł, dzie skazana, što «ŭ nie vyśvietleny dakładna čas, ale nie paźniej za 21 hadzinu 21 chvilinu 11.02.2021» Jahor Staravojtaŭ ažyćciaviŭ zachoŭvańnie knihi».
— Čytali knihu? — spytaŭ sudździa.
— Nie da kanca. Tam raździeły składajucca ź intervju, Ja pračytaŭ čatyry ci piać, — rastłumačyŭ chłopiec.
— Jość tam idei, ab jakich ja začytaŭ? Niejkija momanty pa rasavaj abo nacyjanalnaj vyklučnaści, jakija zaklikajuć da ździajśnieńnia supraćpraŭnych dziejańniaŭ?
— Ja, viadoma, nie ekśpiert, ale ja nie zaŭvažyŭ.
Jahor dadaŭ, što viedaje pra isnavańnie pieraliku ekstremisckich materyjałaŭ, a ŭ im hetaj knihi niama. Chłopcu stała viadoma pra pretenzii da knihi śpiecyjalnaj kamisii ŭčora, 31 sakavika.
— Doma vy žyviacie adzin?
— Adzin.
— A hości prychodziać?
— Ja intraviert, redka.
Advakat Ivan Čyžyk dvojčy chadajničaŭ, kab sud nakiravaŭ zapyt u «Akademknihu» — z nahody taho, ci pradavałasia kniha tam u śniežni 2020 hoda.
— Kali hetaja pradukcyja była ŭ ahulnadastupnym miescy, to na jakoj padstavie moj padabaronny moh mierkavać, što jana moža ŭ sabie ŭtrymlivać prykmiety ekstremizmu? — rastłumačyŭ advakat.
Sud adchiliŭ chadajnictvy, bo administracyjny praces viadziecca ŭ dačynieńni da fizičnaj asoby, a nie jurydyčnaj.
Advakat taksama paličyŭ, što pratakoł parušaje PVKaAP.
— Apisańnie abjektyŭnaha boku nie dazvalaje padvierhnuć administracyjnamu spahnańniu majho padabaronnaha, pakolki ŭ dačynieńni da nazvanaha artykuła nieabchodna ŭstalavańnie, paćviardžeńnie i apisańnie, u pryvatnaści, zachoŭvańnie z metaj raspaŭsiudu. U pratakole ab administracyjnym pravaparušeńni ab mety raspaŭsiudžvańnia nie skazana ni adnaho słova. Skazana, što ažyćciaŭlałasia zachoŭvańnie. Heta absalutna nie adpaviadaje artykułu 19.1 KaAP.
Abaronca taksama źviarnuŭ uvahu, što Staravojtaŭ nie mieŭ abjektyŭnaj mahčymaści razumieć, što kamisija znojdzie ŭ knizie prykmiety ekstremizmu ŭ sakaviku.
Paśla pierapynku sudździa Viktar Šaŭcoŭ adpraviŭ spravu na dapracoŭku.
Nahadajem, što ŭ Biełarusi materyjały pryznajucca ekstremisckimi pa rašeńni suda. Jak praviła, rašeńnie možna abskardzić na praciahu 15 dzion, paśla čaho toj ci inšy vid infarmacyjnaj pradukcyi dadajecca ŭ respublikanski śpis ekstremisckich materyjałaŭ.
