Jość infarmacyja ab atručvańniach, ludzi narakajuć na kiepskaje adčuvańnie paśla elemientarnych pracedur nakštałt čystki zuboŭ.
Što adbyvajecca ŭ horadzie? Pozna ŭviečary «Naša Niva» dazvanilisia da kiraŭnicy Biešankovickaha rajvykankama Haliny Unukovič. Jak akazałasia, jana ŭžo tydzień lažyć ź pnieŭmanijaj u balnicy i kiruje pracesam z balničnaha łožka.
Halina Unukovič, fota: BIEŁTA
— Paviedamlajuć ab krytyčnym paharšeńni jakaści vady ŭ horadzie. Ci jość čym supakoić ludziej?
Halina Unukovič: Naturalna, treba supakoić našych ludziej i ŭsio hramadstva, kali ŭžo ŭsia kraina pierapałochałasia. Ludziam, jakija znachodziacca ŭ paciarpiełym mikrarajonie «Moładzievy», usia infarmacyja daviedziena.
Tak, adbyłasia avaryja, takija situacyi niepradkazalnyja, na žal. Pieršyja skarhi ad ludziej dajšli z zatrymkaj, ale, tym nie mienš, ja liču, što ŭsie zachady my pryniali svoječasova, jak tolki atrymali sihnał.
— Što zroblena?
Halina Unukovič: U našym pasiołku haradskoha typu dźvie stancyi abiezžalezvańnia, adna na vulicy Paŭdniovaj, jana daŭno pracuje, i druhaja, novaja, — na vulicy Moładzievaj, jakaja zapuščana litaralna ŭ 2020-m hodzie.
U hetym rajonie žyvuć ludzi ŭ damach, a taksama jość sadok i škoła. Chacia škoła na kanikułach, u joj pracuje dzionny łahier.
Adpaviedna, jak tolki stała viadoma ab prablemie, my arhanizavali padvoz pitnoj vady i va ŭstanovy adukacyi, i dla žycharoŭ rajona.
Prablemnaja častka vadapravodu adklučana, rajon pieraklučany na «čysty» vadapravod. Pakul truby pramyvajucca, ludziam rekamiendavana nie karystacca vadoj. My dumajem, što ranicaj užo budzie vada dobraj jakaści z ulikam pramyŭki trub. Pakul što žycharam rekamiendavana karystacca padviezienaj vadoj.
Što datyčyć samoj situacyi, to pravodzicca rasśledavańnie, apieratyŭna arhanizavany proby vady — patahiennaj fłory, jakaja vyklikaje dyzienteryju i salmaneloz, nie vyjaŭlena.
Praciahvajucca daśledavańni na najaŭnaść virusaŭ i inšaj patahiennaj mikrafłory, padklučanaja abłasnaja sanstancyja.
U kramy taksama zavieziena butlevaja vada, nahodaŭ dumać, što situacyja praciahniecca doŭha, niama.
My budziem pravodzić rasśledavańnie i daviedajemsia, što kankretna zdaryłasia. Infarmacyja ab vynikach budzie raźmieščanaja na sajcie rajvykankama.
— Ale ci jość užo razumieńnie, što mienavita adbyłosia?
Halina Unukovič: Usie viersii ŭdakładniajucca, ja pakul nie budu vyłučać asnoŭnuju, bo lažu ŭ balnicy i nie vałodaju situacyjaj siekunda ŭ siekundu. Patrebnaja rabota pravodzicca pad kiraŭnictvam majho namieśnika pa žyllova-kamunalnaj haspadarcy, zadziejničanyja śpiecyjalisty kvalifikavanyja i dakapajucca da pryčyn, kab nie dapuścić paŭtareńnia.
