Heta rehijanalny anałah «Dobraj ranicy, Biełaruś!». U Bresckaj vobłaści TRK «Brest» viaščaje na knopcy telekanała «Biełaruś 4».
Kanstancin Śvidunovič. Skrynšot ź jutuba
Vierahodna, što Śvidunoviča zatrymali jašče 24 sakavika (u hety dzień jon apošni raz byŭ u efiry). Ciapier jon źmieščany ŭ SIZA, chutčej za ŭsio, chłopiec prachodzić pa kryminalnaj spravie pa č. 1 art. 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich), pra heta paviedamiła žurnalistka Aksana Brovač.
U čym mienavita abvinavačajuć Śvidunoviča? Udzieł u karahodzie, jaki adbyŭsia ŭ Breście 13 vieraśnia 2020 hoda na skryžavańni praśpiekta Mašerava i bulvara Kasmanaŭtaŭ. Pa hetaj spravie ŭžo byli asudžanyja niekalki dziasiatkaŭ žycharoŭ Bresta i vobłaści.
Kanstancin Śvidunovič rodam z Pružanaŭ. Spačatku vučyŭsia ŭ MDŁU, a potym na žurfaku BDU. «NN» datelefanavałasia da baćki chłopca. Spadar Juryj zajaviŭ, što ničoha nie viedaje pra zatrymańnie syna.
«Niekalki dzion nie razmaŭlali», — skazaŭ baćka.
Paśla hetaha mužčyna abiacaŭ daviedacca padrabiaznaści, ale čamuści tak i nie znajšoŭ času patelefanavać ni synu, ni jahonaj dziaŭčynie.
Mama Kanstancina, Halina Śvidunovič, dastatkova viadomaja ŭ Pružanach asoba, jana redaktarka haziety rajvykankama «Rajonnyja budni».
Litaralna 30 sakavika ŭ svajoj kałoncy Śvidunovič beścić telehram-kanały, jakija zasumniavalisia ŭ naładkach padačy kisłarodu ŭ Pružanskaj CRB.
U samoha Kanstancina paŭsiul zakrytyja sacyjalnyja sietki, adnak možna ŭbačyć, što na avatarcy ŭ instahramie ŭ jaho staić «Pahonia», a ŭ fejsbuku jon pościŭ vyjavu bieł-čyrvona-biełaha ściaha.
Dziaŭčyna Śvidunoviča Chryścina admoviłasia ad kamientaroŭ. «My nie chočam pahoršyć situacyju», — adkazała dziaŭčyna.
