Načalnik adździeła ŭpraŭleńnia infarmacyi hałoŭnaha ŭpraŭleńnia ideałahičnaj pracy Ministerstva abarony Dzianis Fiodaraŭ vykazaŭ pazicyju viedamstva nakont Druhoj suśvietnaj vajny, paviedamlaje BiełTA. Na jaho dumku, siarod krain ES nie było pieramožcaŭ, im niama čym hanarycca.
Nahadajem, u skład antyhitleraŭskaj kaalicyi, akramia SSSR, uvachodzili Francyja, Polšča (členy ES), Vialikabrytanija, Danija, Niderłandy, ZŠA, Juhasłavija i mnohija inšyja krainy.
«Pierahlad historyi Druhoj suśvietnaj vajny źjaŭlajecca stratehičnaj i ideałahičnaj zadačaj zachodnich dziaržaŭ. Bo dla ich pieramoha nie moža być asnovaj honaru, jakaja abjadnoŭvaje pakaleńni, bo siarod krain Jeŭrasajuza nie było krain-pieramožcaŭ. U lepšym vypadku byli vyzvalenyja, u horšym — sajuźniki Hiermanii, niejtralnyja dziaržavy i prosta pieramožanyja, jakija, pa sutnaści, admovilisia ad baraćby, dazvolili siabie akupavać i pracavali na ekanomiku Hiermanii. Tamu žycharam bolšaści jeŭrapiejskich krain tut niama čym hanarycca, jany nie pieražyli taho, što vyprabavali narody Savieckaha Sajuza, jakija znachodzilisia na akupavanych terytoryjach, — skazaŭ Dzianis Fiodaraŭ. — Naša histaryčnaja pamiać pavinna być asnovaj dla honaru, jaki dazvolić abjadnoŭvać usie pakaleńni biełaruskich hramadzian. I naš śviaty abaviazak — abaranić pamiać ab pieramozie savieckaha naroda ŭ Vialikaj Ajčynnaj vajnie».
«Jeŭrapiejskija elity chočuć prymusić nas, naščadkaŭ hierojaŭ-pieramožcaŭ, adčuvać pačućcio viny za svaich baćkoŭ i dziadoŭ, jakija canoj ułasnaha žyćcia zabiaśpiečyli mir dla čałaviectva. Karektavać pamiać pra vajnu ŭ patrebny dla siabie bok dla jeŭrapiejcaŭ aznačaje mahčymaść abialić siabie», — adznačyŭ jon.
«Pierapisvańnie historyi vajny vyhadna samoj Hiermanii, bo pry ŭmovie, što Treci rejch i SSSR niasuć roŭnuju adkaznaść za pačatak vajny, histaryčnaja vina niemcaŭ stanovicca ŭžo nie takoj absalutnaj. Pierahlad historyi Druhoj suśvietnaj vajny vyhadny tym, chto supracoŭničaŭ z fašysckimi kałabaracyjanistami. U hetym razie jany nie ŭdzielničali ŭ hienacydzie ŭłasnaha naroda, a zmahalisia na baku adnaho z hieapalityčnych błokaŭ za svaje nacyjanalnyja ideały. Zamacoŭvajučy ž toj fakt, što SSSR źjaŭlajecca de-fakta złačynnaj dziaržavaj, Zachad padvodzić asnovu dla pierahladu vynikaŭ Druhoj suśvietnaj vajny, — padkreśliŭ Dzianis Fiodaraŭ. — Falsifikacyja historyi vyhadnaja ŭsiamu Zachadu jak u cełym instrumient pasłableńnia Rasii na mižnarodnaj arenie, prynižeńnia roli Savieckaha Sajuza, a adpaviedna i dziaržaŭ postsavieckaj prastory, da jakich adnosicca Biełaruś, u pieramozie nad fašyzmam. Kančatkovaja meta arhanizataraŭ falsifikacyi historyi Druhoj suśvietnaj vajny — suśvietnaje panavańnie, dyskredytacyja Vialikaj Pieramohi, pieratvareńnie SSSR z krainy-pieramožcy ŭ dziaržavu-ahresara, z vyzvaliciela Jeŭropy ŭ jaje akupanta».
